Мәдениет – елдің айнасы

«Семей қаласының орталықтандырылған кітапхана жүйесі» КММ-нің Қалалық орталық кітапханада кітапхана қызметкерлерінің қатысуымен Мәдениет және өнер қызметкерлері күніне арналған «Мәдениет – елдің айнасы» тақырыбында музыкалық кеш өткізілді.

Шараға Ә.Қашаубаев атындағы облыстық филармонияның дәстүрлі әншісі Бақытжан Түктібаев пен кітапхананың тұрақты оқырманы Эльмира Серғазықызы Букашева қатысты.

Кітапхана қызметкерлері мәдениет пен өнердің ел өміріндегі маңызы, рухани құндылықтарды сақтаудағы рөлі туралы мазмұнды әңгіме өрбітті. Қатысушылар қазақ халқының мәдени мұрасы, ұлттық өнердің дамуы мен мәдениет қызметкерлерінің еңбегі жайлы тағылымды ойларын ортаға салды.

Кеш барысында мәдениет тақырыбына арналған өлеңдер оқылып, танымал ақын-жазушылардың қанатты сөздері ұсынылды. Сонымен қатар қатысушылар үшін интеллектуалды-танымдық ойындар мен тақырыптық викториналар ұйымдастырылды.

Шара қонақтары қазақтың халық әндері мен заманауи әндер шырқап, қатысушыларға көтеріңкі көңіл-күй сыйлады.

Іс-шара қатысушылары мәдениет пен өнердің қоғамдағы орны туралы өз пікірлерімен бөлісіп, мерекелік ізгі тілектерін білдірді.

Шара қорытындысында мәдениет, өнер және әдебиет тақырыбындағы кітаптар мен мерзімді басылымдар қойылған «Өңір мәдениетінің өресі» атты кітап көрмесіне шолу жасалды.

 

 

 

 

 

Қалалық орталық кітапхана