Пайдалы модель дегеніміз не?

Қазақстан Республикасы Патент Заңының (Бұдан әрі-Заң) 7-бабының 1-тармағына сәйкес пайдалы модельге адамдарға немесе жануарларға диагностикалық, терапиялық және хирургиялық емдеу тәсілдерін қоспағанда, өнімге (құрылғыға, затқа, микроорганизм штаммына, өсімдіктер немесе жануарлар жасушаларының мәдениетіне), тәсілге (материалдық құралдардың көмегімен материалдық объектіде іс-қимылды жүзеге асыру процесіне), сондай-ақ белгілі өнімді немесе тәсілді жаңа мақсатта не жаңа өнімді белгілі бір мақсатта қолдануға қатысты кез келген саладағы техникалық шешімдер жатады.

Қазақстан Республикасы Заңының 6-бабының 3-тармағында пайдалы модельдер деп танылмайтын объектілер тізбесі көзделетініне назар аударған жөн:

- жаңалықтар, ғылыми теориялар мен математикалық әдістер;

- шаруашылықты ұйымдастыру және басқару әдістері;

- шартты белгілер, кестелер, ережелер;

- ақыл-ой операцияларын орындау, ойындар өткізу ережелері мен әдістері;

- есептеу машиналарына арналған бағдарламалар және осындай алгоритмдер;

- құрылыстарды, ғимараттарды, аумақтарды жоспарлау жобалары мен схемалары;

- бұйымның сыртқы түріне ғана қатысты ұсыныстар;

- қоғамдық тәртіпке, адамгершілік пен мораль принциптеріне қайшы келетін ұсыныстар.

Пайдалы модельге құқықтар Қазақстан Республикасының Патент заңына сәйкес жүргізілетін сараптама нәтижелері бойынша берілетін патентпен қорғалады. Пайдалы модельге патенттер беруге арналған өтінімдерге сараптаманы сараптама жасау ұйымы – Қазақстан Республикасы Әділет министрлігінің "Ұлттық зияткерлік меншік институты" шаруашылық жүргізу құқығындағы республикалық мемлекеттік кәсіпорны жүргізеді. Патент өнеркәсіптік меншік объектісіне басымдықты, авторлықты және айрықша құқықты куәландырады. Пайдалы модельге патент өтінім берілген күннен бастап бес жыл бойы қолданылады. Оның қолданылу мерзімі патент иеленушінің өтініші бойынша, бірақ үш жылдан аспайтын мерзімге ұзартылуы мүмкін.