Жарма ауданының аумақтық сайлау комиссиясының жанынан құрылған «Жас сайлаушылар клубының» жұмыс жоспарына сәйкес, «Ауылдың дамуы – жастардың қолында» тақырыбында Жарма ауданы Әуезов кентінің әкімі Айбол Құдайбергенов жастармен кездесу өткізді.
Кездесу барысында Қазақстан Республикасының жаңартылған Конституциясында айқындалған демократиялық құндылықтар, заң үстемдігі, азаматтардың құқықтары мен міндеттері, сондай-ақ жастардың қоғамдық-саяси өмірге, оның ішінде сайлау науқандарына белсенді қатысуының маңыздылығы сөз болды.
Сонымен қатар, ауылдың әлеуметтік-экономикалық дамуы, мемлекеттік жастар саясаты, кәсіпкерлікті қолдау, білім алу және жұмыспен қамту мәселелері туралы пікір алмасты.
Айбол Құдайбергенов жастарды қоғамдық өмірге белсенді араласып, азаматтық жауапкершілік танытуға, сайлау науқандарына белсенді қатысуға және туған жердің дамуына өз үлестерін қосуға шақырды.
Кездесу барысында жастар өз пікірлерін ортаға салып, көкейлеріндегі сауалдарына жауап алды.
Мұндай кездесулер жастардың азаматтық белсенділігін арттырып, елдің және туған өлкенің дамуына жауапкершілікпен қарауына ықпал етеді.