Облыстың елді мекендерінің шекаралары шегінде сумен жабдықтау және су бұру саласындағы мемлекеттік саясатты іске асыруды қамтамасыз ету, елді мекендер үшін жерасты суларына іздестіру-барлау жұмыстарын ұйымдастыру және жүргізу, елді мекендерді шаруашылық-ауыз сумен жабдықтау үшін жерасты суларына жобалау құжаттарына сараптама жүргізу, ауыз сумен жабдықтау жөніндегі қызметтердің құнын субсидиялау жөніндегі іс-шараларды іске асыру.

Бүгінгі таңда Абай облысы бойынша ауызсумен қамтылу деңгейі 95,3 % (бұрын – 92,8 %, өсім – 2,5 %), соның ішінде қалалар – 95,4 % (Семей қаласы – 94,6 %), ауылдық елді мекендер – 94,9 %.

Облыстың 602 882 тұрғынының ішінен шамамен 28 603 адам ауызсумен қамтамасыз етілмеген (соның ішінде 17 ауылдық елді мекенде – 11 683 адам және Семей қаласында – 16 920 адам).

2024 жылы жаңа құрылыстың 33 жобасы іске асырылып, оның ішінде 18 нысан пайдалануға берілді. Жалпы ұзындығы 467 км болатын су желілері жүргізіліп, 14 691 адам ауызсумен қамтылды.

2025 жылы халықты 100% орталықтандырылған ауызсумен қамтамасыз ету үшін 26 жобаны іске асыру қажет.

2024 жылдан өтпелі 15 жоба

11 жаңа жоба

Аталған 26 жобаны іске асыру 28 603 адамды қамтиды, нәтижесінде Абай облысында ауызсумен қамтылу деңгейі 100 % болады (оның ішінде Семей қаласында – 16 920 адам, 17 ауылдық елді мекенде – 11 683 адам).