Газ баллонды үйде пайдалану кезіндегі қауіпсіздік ережелері !!!

Қазір халық тұтастай баллонға сығымдалған пропан, бутан газдарын ас әзірлеуге, үй жылытуға көптеп пайдаланады. Көгілдір отын адамдарға қолдану жағынан өте ыңғайлы- тез тұтанады, таза, ыдыстарға күйе жұқтырмайды, түтін шығармайды.

      Былай алып қарағанда газдың отын ретінде пайдасы теңдесіз, бірақ адамдар оның қатерлі жақтарын көбінесе еске ала бермейді. Газға ұқыппен қарамай, сәл ғана қателік кетсе, «дос» болып жүрген пропаныңыз нағыз қатерлі жауыңызға айналып, жақындарыңызға және үйіңізге үлкен апаттар әкелуі мүмкін.

       Газ жарылысының салдарынан қайғылы оқиғалар елімізде жиі болып тұрады. Бір адамның ұқыпсыздығынан, қауіпсіздік ережелерін сақтамауынан көрші тұратын бірнеше жанұя қайғылы жағдайға тап болып, зардап шегеді.

      Қазақстан Республикасының «Газ туралы» Заңы бойынша – газ баллон қондырғысын 2 қабаттан жоғары тұрғын үйлерде пайдалануға және сақтауға тыйым салынады.

      Осыған орай, азаматтардың газ баллондарды пайдалану кезінде қауіпсіздік ережелерін сақтауды ескертеміз:

• Газ баллондарын, жабдықтарын өзіңіз жөндемеңіз;
• Газға темір құралдармен соқтықпаңыз, ұшқын шығып атылуы мүмкін;
• Газ тетіктерін ашып, жабатын құралдарды қараусыз қалдырмаңыз, әсіресе балалардың қолына тимесін;
• Газ қондырғысына жіп байлау және үстіне жанғыш заттарды ілуге;
• Газ қондырғысын бөлмені жылыту үшін пайдалануға тыйым салынады.

 

Егер газдың иісі шыққанын сезсеңіз:

• Ашық отты пайдаланбаңыз;
• Дереу баллонды жабыңыз;
• Бөлмені желдетіп, газдан тазартыңыз;
• Газ толған бөлмеде телефонды қолдануға, от тұтатуға, ешқандай электр құралдарын қосуға болмайды;

 

                             Аягөз ауданының Төтенше жағдайлар бөлімі