«Жедел әрекет тобының» жоспарлы отырысы өтті

Үстіміздегі жылдың 26 маусымында аудан әкімінің орынбасары М.Смағұловпен бекітілген аудандық «Жедел әрекет тобының» жоспарлы отырысы өтті. Күн тәртібінде «Жедел топ мүшелерінің зорлық-зомбылыққа, қатыгездікке және басқа да заңсыз әрекеттерге душар болған отбасылар мен балаларды анықтау және олар бойынша нақты шаралар қабылдау жөніндегі ведомствоаралық өзара әрекеттесу алгоритмі» талқыланып, ауданымыз бойынша алдағы уақытта атқарылатын іс-шаралар айқындалды. «Nur Otan» партиясының #«Бақытты отбасы» партиялық жобасы аясында ауданымыздың орталығымен қоса барлық ауылдық округтерде, «Үйдегі зорлық-зомбылық мәселелері бойынша» құрылған жедел әрекет топтары өз жұмыстарын бастады.
Аталмыш топтардың қызметінің негізгі бағыты қиын жағдайға тап болған жанұяларды, әлеуметтік жағынан нашар отбасыларды сонымен қатар, балалар мен әйелдерге қатысты зорлық-зомбылық, қатыгездік және басқа да заңға қайшы іс-әрекеттерді анықтап, анықталған фактілер бойынша тиісті көмек көрсету болып табылады. Жедел әрекет топтарының құрамына «Nur Otan» партиясының Абай аудандық филиалының қызметкерлері, әлеуметтік қорғау саласының мамандары, кәмелеттік жасқа толмағандардың істері жөніндегі инспектор, ауылдық округтердің учаскелік инспекторлары, мектеп басшылары мен қоса білім беру саласының кәсіби психологтары мен педагогтары, медицина қызметкерлері және қоғамдық ұйымдардың өкілдері кірген.
Жоғарыда аталған мәселелер бойынша қандайда бір сұрақтарыңыз болған жағдайда, немесе аталмыш құқықбұзушылық фактілері орын алған жағдайда аудандық полиция бөліміне (8 /72 252/ 91326, 101) немесе «Nur Otan» партиясының Абай аудандық филиалына (8 /72 252/ 91556) хабарласуларыңызға болады.