Меню
Ақсуат ауданында 2026 жылдың I–II тоқсанында ішкі саясат, мәдениет және тілдерді дамыту саласында бірқатар маңызды жұмыстар атқарылды
Ақсуат аудандық ішкі саясат, мәдениет және тілдерді дамыту бөлімі 2026 жылдың I–II тоқсанында мемлекеттік ақпараттық саясатты іске асыру, қоғамдық-саяси тұрақтылықты сақтау, мәдениет саласын дамыту және мемлекеттік тіл саясатын жүзеге асыру бағытында жоспарлы жұмыстар жүргізді.
Мемлекеттік саясатты ақпараттық қолдау
Мемлекет басшысы Қасым-Жомарт Тоқаевтың Қазақстан халқына Жолдауында айқындалған басым бағыттарды халық арасында кеңінен түсіндіру жұмыстары жүйелі түрде жүргізілуде. Осы мақсатта аудан көлемінде ақпараттық-түсіндіру топтары құрылып, мемлекеттік бағдарламалар мен реформаларды насихаттау бағытында кездесулер, пікір алмасулар ұйымдастырылды.
Жолдауды ақпараттық сүйемелдеу аудандық «Тарбағатай» және «Ақсуат арайы» газеттері, сондай-ақ әлеуметтік желілер арқылы жүзеге асырылып келеді. Қоғамдық пікірге тұрақты мониторинг жүргізіліп, әлеуметтік желілерде көтерілген мәселелер бойынша тиісті мемлекеттік органдар тарапынан жедел шаралар қабылдануда.
Діни тұрақтылық қамтамасыз етілуде
Ауданда діни ахуал тұрақты. Дін мәселелері жөніндегі ақпараттық-түсіндіру тобы халық арасында құқықтық және діни сауаттылықты арттыру, радикалды идеологияның алдын алу бағытында жүйелі жұмыстар жүргізуде.
Бүгінде аудан аумағында 8 мешіт пен 6 намазхана жұмыс істейді. Интернет кеңістігіне жүргізілген мониторинг барысында экстремистік немесе деструктивті сипаттағы материалдар анықталған жоқ. Мешіт жамағаттары арасында тұрақты түрде түсіндіру жұмыстары өткізіліп келеді.
Этносаралық келісім – тұрақтылық кепілі
Ақсуат ауданында этносаралық қатынастар саласындағы жағдай тұрақты. Есепті кезеңде этносаралық негіздегі қақтығыстар мен құқық бұзушылықтар тіркелген жоқ.
Аудан халқының саны – 18 871 адам. Оның басым бөлігін қазақ ұлтының өкілдері құрайды. Сонымен қатар неміс, тәжік, орыс, татар, болгар, ұйғыр және украин этностарының өкілдері татулық пен келісім жағдайында өмір сүріп келеді.
Әлеуметтік желілер мен интернет-ресурстарға тұрақты мониторинг жүргізіліп, этносаралық қатынастарға қатысты ақпараттық-түсіндіру жұмыстары жалғасуда.
Мемлекеттік рәміздерді насихаттау
Ауданның барлық мемлекеттік мекемелерінде мемлекеттік рәміздер қолданыстағы стандарттарға толық сәйкестендірілді. Мемлекеттік Ту мен Елтаңбаны пайдалану және сақтау мәселелері тұрақты бақылауда. Білім беру ұйымдары мен ауылдық округтерде мемлекеттік рәміздерді насихаттайтын арнайы бұрыштар мен көрнекі ақпараттар орналастырылған.
Қоғамдық-саяси ахуал тұрақты
Ауданда қоғамдық-саяси ахуалға тұрақты мониторинг жүргізілуде. Тоқсан сайын әлеуметтік сауалнамалар ұйымдастырылып, тұрғындардың қоғамдық пікіріне талдау жасалады.
Жүргізілген зерттеулер нәтижесінде аудан тұрғындарының мемлекеттік саясатқа қолдау білдіретіні және қоғамдық тұрақтылықтың сақталғаны анықталды.
Мәдениет саласында ауқымды жұмыстар атқарылды
Ауданда «Ақсуат мәдениет үйі» КМҚК құрамындағы 5 мәдениет үйі, 5 ауылдық клуб және «Әулие Ырғызбай Досқанаұлы» кесенесі халыққа мәдени қызмет көрсетуде. Барлығы 125 қызметкер еңбек етеді, оның ішінде 61-і мәдениет саласының мамандары.
Есепті кезеңде мәдениет мекемелерінде Мемлекет басшысының Жолдауында белгіленген басым бағыттарға сәйкес құқықтық мәдениет, ұлттық құндылықтар, патриоттық тәрбие, рухани жаңғыру, цифрлық мәдениет, отбасы құндылықтары, экологиялық мәдениет және шығармашылық бағыттар бойынша кешенді жұмыстар ұйымдастырылды.
Жыл басынан бері аудан бойынша 150-ден астам мәдени іс-шара өткізіліп, оған 28 мыңнан астам тұрғын қатысты.
Ақсуат халық театры республикалық театр фестивалінде Шыңғыс Айтматовтың «Боранды бекет» моноспектаклімен қатысып, ІІ орынды иеленді.
Сонымен қатар мәдениет нысандарының материалдық-техникалық базасы кезең-кезеңімен жаңартылып, жаңа мәдениет үйлерінің құрылысы мен жөндеу жұмыстары бойынша жобалар іске асырылуда.
Кітапханалар жұмысы жүйелі жүргізілуде
Аудан бойынша 11 кітапхана халыққа қызмет көрсетуде.
І–ІІ тоқсанда кітапханаларда 4 280 оқырман тіркеліп, 56 мыңнан астам кітап оқырмандарға ұсынылды. Кітап қоры 145 884 дананы құрайды.
Есепті кезеңде мемлекеттік бағдарламалар, мерейтойлық және атаулы күндер аясында 40 мәдени-ағартушылық іс-шара ұйымдастырылып, мыңнан астам тұрғын қамтылды.
Президент Жолдауын насихаттау, цифрлық сауаттылықты арттыру, «Бір ел – бір кітап» республикалық акциясы, сондай-ақ қазақ әдебиетінің көрнекті тұлғаларының мерейтойларына арналған әдеби кештер мен кітап көрмелері өткізілді.
Қорытынды
2026 жылдың I–II тоқсанында Ақсуат аудандық ішкі саясат, мәдениет және тілдерді дамыту бөлімі қоғамдық келісімді нығайту, мемлекеттік саясатты түсіндіру, мәдениет пен руханиятты дамыту бағытында жоспарлы жұмыстарды нәтижелі жүзеге асырды.
Алдағы кезеңде мәдени инфрақұрылымды дамыту, цифрлық жобаларды енгізу, мәдени қызметтердің сапасы мен қолжетімділігін арттыру, сондай-ақ қоғамдық тұрақтылықты сақтау бағытындағы жұмыстар жалғасатын болады.
