Сарқанда тыл еңбек ардагерлеріне құрмет көрсетілді

Сарқан ауданында Ұлы Отан соғысындағы Жеңістің 80 жылдығына орай тыл ардагерлеріне арналған салтанатты шара ұйымдастырылды.

Аудан әкімі Маманбаев Ғалымжан Қанатұлы тыл еңбеккерлерін құттықтап, Мемлекет басшысы Қасым-Жомарт Кемелұлы Тоқаевтың тапсырмасына сәйкес, ардагерлерге «1945–2025» мерекелік төсбелгісін салтанатты түрде табыстады.

– Сіздердің сол бір ауыр кезеңдегі маңдай тер мен қажырлы еңбектеріңіз ұрпақ жадында мәңгі сақталады. Бүгінгі бейбіт өмір, өсіп келе жатқан ұрпақ – соның жемісі. Сіздерге деген ел алғысы ешқашан толастамайды, – деді аудан басшысы өзінің құттықтау сөзінде.

Салтанатты рәсім соңында мерекелік көңіл-күйді арттырған рухты ән мен би қойылымдары кештің сәнін келтірді.

Айта кету керек, аудан бойынша жалпы 154 тыл ардагері мерекелік төсбелгімен наградталды.