Бейбіт Исабаев азаматтарды жеке мәселелері бойынша қабылдады

Облыс әкімі Бейбіт Исабаев азаматтар үшін жеке қабылдау өткізді, - деп хабарлайды Жетісу облысы әкімінің баспасөз қызметі.

Қабылдауға алғашқы болып кірген жалғызілікті ана Б. Сейсембаева балаларының денсаулық жағдайын айта келе, соның ішінде туабітті патологиясы бар қызы Ақмаралдың жайына қатты алаңдайтынын жеткізді. Оған тағайындалған 2-топ мүгедектігіне келіспейтін айтқан ана жалғыз қызының өмір бойғы зейнетке шығуынан үміт етеді. Бұл мәселеге қатысты жауапты мамандардың талқылап, тиісті шешім шығаруы қажеттігі туралы облыс әкімі денсаулық сақтау басқармасының басшысына тапсырма берді. Облыс басшысы сала мамандарына мұндай мәселеге салғырт қарамай, жіті назар салу керектігін ескертті.

Қоғамдық қабылдауға жазылған өңір тұрғындарының дені баспана мәселесін көтерді. Көпбалалы ана Б. Арзымбетова Ескелді ауданынан пәтер берілсе деген үмітте. Ал, 1-топтағы мүгедектігі бар зейнеткер Л. Цай жүрегіне қондырғы орнатылғанын, көзінің тірісінде баспана қуанышына бөленгісі келетінін айтты. Сол секілді қабылдауға кірген азаматтардың дені мемлекеттік тұрғын үй қорынан үй алу мәселесін қозғады. Олардың бәрінің мәселесін жіті зерделеп, өтініш-тілегін мұқият тыңдаған Бейбіт Исабаев жауапты мамандарға нақты тапсырмалар жүктеді. Пәтер заң шеңберінде, кезек ретімен берілетінін түсіндірді.

 

Жетісу облысы әкімінің баспасөз қызметі.