Сайлауға келушілер Наурыз көжеден дәм татты

Ұлыстың ұлы күнімен тұспа-тұс келген еліміздің Парламенті мен барлық деңгейдегі мәслихаттар сайлауы Текелі қаласындағы №446 сайлау учаскесінде ерекше көңіл-күйде өтіп жатыр. Келушілер Наурыз көжеден, бауырсақтан дәм татып, Ұлыс күнінің келгенін сезінуде, - деп хабарлайды Жетісу облысы әкімінің баспасөз қызметі.

Сайлау учаскесіне жақындағаннан-ақ ұлттық нақыштағы әсем ән құлақ құрышын қандырады. Табалдырықтан аттай салысымен ұлттық қолөнер бұйымдарының көрмесін көз тартады. Оң қапталда дойбы, шахмат ойнауға үйір үлкен-кішіге арнайы ойын үстелдері қойылған. Сайлаушылар өздері лайық деп тапқан партия мен кандидатына дауыс беріп шыққан соң, жеті түрлі дәмнен дайындалған Наурыз көже мен бауырсақтан дәм татуда. Бұл жерде ұлттық ойынның да көрігі қызып, асық атудан шеберлік сынасып жатқандар да бар.

- Бүгін еліміз үшін ерекше күн. Өзімнің учаскеме келіп, дауыс беріп шықтым. Сонымен қатар мұнда Наурыздың келгенін білдіретін ерекше аура бар екен. Соны көріп, сезініп, ерекше қуанып тұрмын, - деді текелілік тұрғын Данахан Сапиева.

Жетісу облысы әкімінің баспасөз қызметі.