Бүгінде ауылдағы ең өзекті мәселелердің бірі – апатты жағдайда тұрған ескі үйлер. Қанат Есболатов Рысқұлов көшесінде орналасқан екі қабатты тұрғын үйлердің жағдайын қарап шығып, жауапты тұлғаларға нақты тапсырмалар берді.
Айта кетейік, Сарыөзек ауылында Рысқұлов, Әл-Фараби, Масанова, Вожакина және Майлин көшелерінің бойында екі қабатты 36 тұрғын үй бар. Оның 2-і қаңқалы, қалған 34-і қызыл кірпіштен салынған.
Аудан басшысы тұрғындардың сыни пікіріне назар аударып, Сарыөзек ауылындағы қоқыстың шығарылмауы мәселеге айналып отырғанына көңіл бөлді. Ал Бауыржан Момышұлы көшесінің бойында орналасқан 5 қабатты 30 пәтерлі тұрғын үйдің ауласындағы қоқыстың шығарылмау себебі тұрғындардың жауапсыздығынан болып отыр.
Сондай-ақ, ауыл әкімі Батырхан Ешметұлынан қоқыс шығаратын көліктер ұйымдастыруды талап етіп, әкімдікке бақылауды күшейтуді тапсырды.
Қанат Болатұлы 5 қабатты 40 пәтерлі тұрғын үйдің құрылыс барысымен танысып, аудандық құрылыс бөлімінің басшысы Асхат Жанатұлына сын, ескертпелерін айтты.
Қанат Болатұлы ауыл әкіміне, тұрғын үй- коммуналдық шаруашылығы, жолаушылар көлігі және автомобиль жолдары бөлімінің басшысына, ауыл көшелерін, саябақтарды санитарлық күтіп ұстау жұмыстарымен және қатты-тұрмыстық қалдықтарды шығарумен айналысатын мердігер ұйымдардың басшыларына ірі көлемді қоқыстарды шығару, сенбіліктер өткізу, ауылды абаттандыру, т.б. мәселелерге қатысты нақты тапсырмалар берді.
Сонымен қатар қараусыз қалған мал иелеріне ӘҚБтК-нің 408-бабының 1-бөлігі бойынша 3 АЕК көлемінде айыппұл салынып, әкімшілік хаттама толтырылатының естеріңізге сала кетейік. Қабылданып жатқан шараларға қарамастан, мал иелері тарапынан салғыттық таныту фактілері азаймай тұр. Бұл автожолдардағы жол-көлік оқиғаларына және мал ұрлығына алып келеді.