Жаркент және Сарыөзектегі әскери бөлімдердің жағдайы зерделенді

Қазақстан Республикасы Қорғаныс министрінің тәрбие және иднологиялық жұмыстар жөніндегі орынбасары, генерал – майор Асқар Мұстабеков бастаған ақпараттық-түсіндіру тобы Жаркент пен Сарыөзек гарнизондарындағы әскери бөлімдерге жұмыс сапарымен барды.

  Іссапардың негізгі мақсаты – әскери бөлімдердегі моральдық-психологиялық ахуалды зерделеу, әскери қызметшілердің әлеуметтік-тұрмыстық жағдайымен танысу және жеке құраммен тікелей байланыс орнату болды.

Сапар барысында қорғаныс минстрінің орынбасары әскери бөлімдердің инфрақұрылымын аралап, сарбаздардың жатын орындары, асханалар, тұрмыстық нысандар мен жұмыс орындарының жағдайымен танысты. Ол сондай-ақ, әскери қалашықтағы тұрғын үйлерді де аралап көріп, әскери қызметшілер мен олардың отбасы мүшелеріне жасалған тұрмыстық жағдайларға ерекше назар аударды.

Сонымен қатар мерзімді әскери қызметшілермен жеке кездесулер ұйымдастырылды. Кездесу барысында генерал – майор Асқар Мұстабеков сарбаздардың денсаулық жағдайы, әскери қызметтің маңыздылығы, олардың құқықтары мен міндеттері жөнінде кеңінен әңгімелесті. Әрбір сарбаздың жеке сұрақтарына жауап беріп, олардың ұсыныс-пікірлерін тыңдады.

Бұдан бөлек, офицерлер және сержанттар құрамымен де арнайы жиын өтті. Онда әскери тәртіпті сақтау, жауынгерлік даярлық деңгейін арттыру, әскери қызметшілерді тұрғын үймен қамтамасыз ету және әлеуметтік қолдау шаралары талқыланды. Әскери мамандықтың беделі мен жауапкершілігі жөнінде де мазмұнды пікір алмасу болды.

Жұмыс сапарының қорытындысында генерал – майор Асқар Мұстабеков әскери бөлімдердегі тәрбие және идеологиялық жұмыстарды жетілдіру, сондай-ақ жеке құрамның әлеуметтік жағдайын жақстарту бағытында нақты тапсырмалар берді.

 

Сарыөзек гарнизоны баспасөз қызметінің бастығы

подполковник Абзал Сартаев