Жетісуда білім беру мен денсаулық сақтау нысандарында жылыту маусымына дайындық аяқталды

Жетісу облысында білім беру және денсаулық сақтау нысандарында жылыту маусымына дайындық аяқталды. Сол сияқты көпқабатты тұрғын үйлердің маусымға дайындық деңгейі 96% құрап отыр, - деп хабарлайды Жетісу облысы әкімінің баспасөз қызметі.

Облыстық энергетика және тұрғын үй-коммуналдық шаруашылығы басқармасының мәліметіне сүйенсек, жылыту маусымына дайындалу барысында жылумен жабдықтау объектілері мен инженерлік желілілер жөнделіп, отын сатып алынуда.  

 «2 турбинаға, 35 қазанға, 79,5 шақырым сумен жабдықтау, 12,8 шақырым жылу, 1,1 мың шақырым электр желілеріне және 208 трансформаторлық қосалқы станцияға жөндеу жұмыстары жүргізіліп жатыр. Жылумен жабдықтаушы кәсіпорындар 293 мың тонна көмір және 6,4 мың тонна мазут дайындауда. Оларды бекітілген кестеге сәйкес жеткізу жүргізіледі, қазір 2,3 мың тонна мазут қоры бар. Сонымен қатар бюджеттік ұйымдарына 15,1 мың тонна көмір және 10,6 млн. литр сұйық отын жеткізілуде. Жалпы, облыс бойынша халыққа көмірдің қажеттілігі 397 мың тонна. Бүгінгі таңда 68,3 мың тонна көмір сатылған. Қазіргі кезде облыс қоймаларына орта есеппен тәулігіне 13 вагон немесе 897 тонна көмір жеткізілуде. Жылыту маусымына дайындық жұмыстары жалғасып, бұл шаралар тұрақты бақылауда тұр», - делінген басқарманың хабарламасында.

Дайындық барысында жылыту қазандықтарындағы жаңғырту жұмыстарының маңызы зор. Осы орайда облыс орталығындағы «Басқуат» қазандығы базасында электр қуаты 84 МВт, жылу қуаты 70 Гкал/сағ болатын бу-газ станциясын салу жобасы іске асырылуда. Жоба 3 кезеңнен тұрады, оның екі кезеңі осы жылдың желтоқсан айында аяқталады деп жоспарланған. Аталған жоба толық іске асырылғанда «Басқуат» қазандығының жүктемесі қосымша 30%-ға дейін төмендейді.

Сондай-ақ Текелі ЖЭО-2-ні кеңейту бойынша жалпы жоспар аясында электр қуаты 53 МВт және жылу қуаты 48 Гкал/сағ болатын бу-газ қондырғысын 3 кезеңмен іске қосу көзделген. Бұл жобаны іске асыру нәтижесінде станцияны жаңғырту мәселесі шешіліп, жаңа нысандарды қосуға мүмкіндік беретіндей қосымша жылу қуатты еселенеді.

Газдандыру мәселесіне келсек, Панфилов ауданын қоса алғанда Кербұлақ ауданынан Талдықорғанға дейінгі 126 елді мекеннің 84-і газдандырылды, яғни қамту деңгейі – 58,2%. 2025 жылдың соңына дейін аталған аудандар толық газдандырылғанда қамту деңгейі 71,4%-ға немесе 500 мың адамға жетеді. Сондай-ақ «Талдықорған – Үшарал» газ құбырының құрылысы аяқталуға жақын. Осы жобалар іске асырылғаннан кейін газбен қамтуға жататын 192 елді мекен түгелдей газбен қамтылады, нәтижесінде 624 мыңнан астам тұрғын немесе жалпы халықтың 92%-ы көгілдір отынға қол жеткізеді.

 

Жетісу облысы әкімінің баспасөз қызметі.

Фотографтар: Дмитрий Ерофеев, Жеңіс Ысқабай