Жетісулық құрылысшыларға кәсіби мерекеде мемлекеттік марапаттар тапсырылды
Жетісу облысында Құрылысшылар күніне орай сала мамандарына құрмет көрсетіліп, облыс әкімі Бейбіт Исабаев бірқатар азаматқа мемлекеттік марапаттар тапсырды, - деп хабарлайды Жетісу облысы әкімінің баспасөз қызметі.
Талдықорғандағы Салтанат сарайында өткен мерекелік шарада жиналған көпшілікті кәсіби мерекелерімен құттықтаған өңір басшысы қоғам өміріндегі құрылыс саласының маңызына тоқталып, сала мамандарының экономиканы ілгерілетудегі, халықтың тұрмыс сапасын жақсартудағы ерен еңбегін, соның ішінде жобалаушы, сәулетші, инженер, тас қалаушы, сылақшы, бетоншы, сырлаушы сияқты көптеген маман иелерін атап өтті.
- Сіздердің қажырлы да табанды еңбектеріңіздің арқасында жыл сайын қаншама отбасы жайлы пәтерге қол жеткізуде. Сонымен қатар мектеп, балабақша, аурухана сияқты маңызды нысандар тұрғызып, елдің әлеуметтік жағдайын жақсартуға белсене атсалысып келесіздер. Осындай ерен еңбектеріңіз үшін баршаңызға алғысымды білдіремін. Адал еңбек құндылығын қалыптастыру, қарапайым жұмысшы адамының мәртебесін көтеру, жастарды еңбекке құрметпен қарауға тәрбиелеу – біздің ортақ міндетіміз, - деді Бейбіт Исабаев өз құттықтау сөзінде.
Кәсіби мерекеге орай осы күні құрылыс саласының бірқатар мамандары мемлекеттік марапатқа ие болды. Атап айтқанда, «Beton Stroi LTD» ЖШС директоры Азиз Есмаханов пен «Темірқазық-стройпроект» ЖШС шебері Кенжебай Құсайыновқа «Құрмет» ордені, «Нұр-Шапағат-Құрылыс» ЖШС бригадирі Біржан Нұрғабыл мен «Строительная компания «Жаркент Алғыр» ЖШС кран жүргізушісі Дидар Сұлтанға ІІІ дәрежелі «Еңбек Даңқы» ордені, сондай-ақ «Жөндеу-Құрылыс» ЖШС бригадирі Ерполат Сырлыбаевқа «Ерен еңбегі үшін» медалі, «УПТК» ЖШС директоры Исақан Искаков пен «СП NEFT» ЖШС директоры Нұрлан Қадырбековке Қазақстан Республикасы Премьер-Министрінің Алғыс хаты, ПМК-16 және ПМК-07 құрылыс мекемесінің прорабы Тойлыбай Қожахметовке Премьер-Министрдің бірінші орынбасарының Алғыс хаты тапсырылды. Сонымен бірге тағы бірнеше азаматқа облыс әкімінің Құрмет грамотасы мен Алғыс хаты берілді.
- «Жаркент Алғыр» құрылыс компаниясында кран жүргізуші болып жұмыс істеймін. Жұмысым өзіме ұнайды. Зәулім ғимараттар, биік үйлер салғанда сол құрылысқа өзімнің де үлес қосқаныма риза боламын. Мен үшін адал жұмыс, адал табыс – өмірдің ең басты жетістігі. Өзімнің 4 балам бар. Оларды да еңбексүйгіштікке тәрбиелеп келемін. Биыл Жұмысшы мамандықтар жылы деп жарияланып, жұмысшы мамандарға көп көңіл бөліне бастады. Маған бүгін еңбегімді елеп, марапат тапсырғанына қуаныштымын, - дейді «Строительная компания «Жаркент Алғыр» ЖШС краншысы, жаркенттік Дидар Сұлтан.
- Құрылыс саласында 25 жылдан бері жұмыс істеп келемін. Біздің компаниямыз тұрғын үй салумен айналысады. Бүгінге дейін Талдықорғанда «Қаратал», «Шығыс», «Болашақ», «Бірлік», «Құлагер» сияқты көптеген шағын аудандарда тұрғын үйлер салдық. Қазір «Жастар – 3» шағын ауданында әлеуметтік осал топтағы отбасылар үшін баспана тұрғызып жатырмыз. Біздің құрылыс компаниямызда 200-ден астам адам жұмыс істейді. Біз салған үйлер тас қалаушы, бетоншы, кафель төсеуші, электрик, сентехник т.б. көптеген жұмысшы мамандарымыздың еселі еңбегімен бой көтеріп жатыр. Әріптестерімді кәсіби мерекелерімен құттықтаймын. Еңбектері жана берсін, - деді «Жетісу жилСтрой» ЖШС директоры Азиз Есмаханов.
Биыл облыста 317 нысанның құрылысы жүргізіліп, соның 276-сы іске қосылады. Оның ішінде 133-і - тұрғын үй, 98-і – денсаулық сақтау объектісі, 9-ы – білім беру саласының нысаны. Осы орайда «Жайлы мектеп» ұлттық жобасы аясында биыл Алакөл ауданы Достық ауылынан 600 бала жаңа білім ошағы қолданысқа берілетінін атап өтуге болады.
Жетісу облысы әкімінің баспасөз қызметі.
Фотосуреттерді түсірген: Жеңіс Ысқабай.