Конституция күніне орай Жетісу облысында Білім беру инфрақұрылымын қолдау қорының қаражаты есебінен салынған жаңа мектеп пайдалануға берілді

Жетісу облысының Панфилов ауданына қарасты Талды ауылында Конституция күні қарсаңында 300 орынды жаңа мектеп пайдалануға берілді. Бұл нысан Білім беру инфрақұрылымын қолдау қорының қаражаты есебінен салынды, – деп хабарлайды Жетісу облысы әкімінің баспасөз қызметі.

Өңір басшысының атынан ауыл тұрғындарын айтулы оқиғамен облыс әкімінің орынбасары Диас Есдәулетов құттықтады.

– Білім алуға қолайлы жағдай жасау – Мемлекет басшысы қойған басым міндеттердің бірі. Осыған байланысты өңірде заманауи, сапалы материалдық-техникалық базасы бар мектептердің құрылысына ерекше көңіл бөлініп келеді. Мысалы, былтыр Жаркент қаласында 1200 орынды жаңа мектеп ашылса, биыл Достық ауылында 600 орынды білім нысаны пайдалануға беріледі. Бұдан бөлек, өңірде 6 жаңа мектептің құрылысы жүріп жатыр, оның үшеуі биыл қолданысқа беріледі, солардың бірі - бүгін Талды ауылында ашылып отыр осы мектеп. Бұл нысан Білім беру инфрақұрылымын қолдау қоры есебінен салынды, – деді Д. Есдәулетов.

Мектеп директоры Айдар Қоңыратовқа салтанатты түрде символдық кілт табысталып, ғимараттың лентасы қиылғаннан кейін жиналған жұртшылық жаңа мектептің ішін аралап көрді.

Қуанышты жаңалыққа орай мектептің педагог-психологы Фарида Досбергенова пікірін білдірді:

– Бар болғаны бір жылдың ішінде кең де әдемі мектеп салып берді. Мұндай жерде оқып, жұмыс істеу – үлкен қуаныш. Бұрынғы ғимаратымыз әбден ескірген еді, сондықтан мереке қарсаңында ауылымызда жаңа мектептің ашылғанына бәріміз қуанып жатырмыз. Осы мектептің арқасында балаларымыз үлкен жетістікке жетіп, туған жерінің мақтанышына айналады деп сенеміз, – деді ол.

Талды ауылындағы жаңа мектептің 6-сынып оқушылары Нұртас Мұрат пен Аяулым Тұмарбай да қуанышын жасырған жоқ:

– Жаңа мектебіміздің ашылғанына өте қуаныштымыз. Мұнда сапалы білім алуға, ой-өрісімізді кеңейтуге, шығармашылықпен, спортпен айналысуға барлық мүмкіндік бар. Біз жалықпай білім алып, түрлі байқаулар мен пән олимпиадаларында туған өлкеміз бен сүйікті мектебіміздің атын шығарамыз деп уәде береміз, – дейді оқушылар.

Атап өтсек, бұл мектепте шамамен 400 бала білім алады. Жаңа білім ошағы қажетті құралдармен толық жабдықталған, атап айтқанда мұнда пәндік кабинеттер, IT-сыныптар, спорт және акт залдары, кітапхана мен зертханалар бар.

Осы орайда Талды ауылында тұратын меценат азаматтар ауылға жұмыс істеуге келетін білім беру, денсаулық сақтау және ауыл шаруашылығы салаларындағы жас мамандар үшін 19 жеке тұрғын үй салды. Бұл үйлерді бөлу ісімен жергілікті ардагерлер айналысуда.

Жалпы, 2022-2025 жылдар аралығында Жетісу облысында 276 әлеуметтік нысан салынды және жөнделді, оның 41-і - білім беру нысаны. Атап айтқанда, үш жылда өңірде 41 мектеп жаңартылды, яғни 6390 орынға арналған 19 мектеп салынып, 22 мектепке күрделі жөндеу жүргізілді. 2025 жылы тағы 10 мектептің құрылысын аяқтау жоспарланып отыр.

Жетісу облысы әкімінің баспасөз қызметі.

Фотографии: Нұрбол Қанағат