Талдықорғанда «Ерлікке тағзым» атты жастармен кездесу өтті

Талдықорғанда әскери-патриоттық рухты көтеру, жастардың бойында елге деген сүйіспеншілік пен жауапкершілікті қалыптастыру мақсатында «Ерлікке тағзым» тақырыбында жастармен мазмұнды кездесу өтті.

Аталған іс-шара жастардың тарихи санасын жаңғыртып, ұлттық рухын нығайтуға бағытталды. Кездесу барысында қатысушылар халқымыздың басынан өткен күрделі кезеңдерге шолу жасап, ел тәуелсіздігі жолында жан аямай күрескен батырлардың ерлігі мен қайсарлығы туралы кеңінен мәлімет алды. Батыр бабаларымыздың Отан үшін жасаған жанқиярлық ерліктері дәріптеліп, олардың өнегелі өмір жолы бүгінгі ұрпаққа үлгі ретінде ұсынылды.

Іс-шараға арнайы шақырылған қонақтар қатысып, өз өмірлік тәжірибелерімен бөлісті. Олар жастарға Отан алдындағы борыш, әскери қызметтің маңыздылығы, тәртіп пен жауапкершілік, ел қорғаудың абыройлы міндет екені жөнінде мазмұнды ой-пікірлерін жеткізді. Қонақтардың тағылымды әңгімелері жастарға ерекше әсер қалдырып, олардың бойында патриоттық сезімді арттыруға ықпал етті.

Кездесу барысында қатысушылар белсенділік танытып, өздерін толғандырған сұрақтарын қойып, ашық пікір алмасты. Еркін форматта өткен сұрақ-жауап бөлімі жастардың ой еркіндігін дамытуға, қоғамдық белсенділігін арттыруға мүмкіндік берді.

«Ерлікке тағзым» атты кездесу – өткенге құрмет білдіріп, бүгінгі құндылықтарды дәріптеген, болашаққа бағыт-бағдар берген маңызды шаралардың бірі болды. Шара соңында қатысушылар ұйымдастырушыларға алғыстарын білдіріп, мұндай кездесулердің маңыздылығын ерекше атап өтті.