Талдықорғанда құқықтық сауаттылыққа арналған зияткерлік ойын ұйымдастырылды

Талдықорған қаласында «Заң мен тәртіп» идеологиясы аясында интеллектуалды ойын форматында іс-шара өтті. Іс-шараның басты мақсаты – жастардың құқықтық сауаттылығын арттыру, заңға құрмет сезімін қалыптастыру, құқықтық нормалар туралы білім беру, қоғамдағы тәртіп пен жауапкершіліктің маңызын түсіндіру, сондай-ақ логикалық ойлау, талдау және шешім қабылдау қабілеттерін дамыту, құқықбұзушылықтың алдын алу және заңды құрметтеуге тәрбиелеу болды.

Интеллектуалды ойынға 3 адамнан құралған 4 команда қатысып, олардың қатарында мектеп оқушылары да болды. Бұл формат заң мен тәртіп тақырыбына қызығушылық танытқан жас буынға өз білімін сынап, жаңа ақпараттармен алмасуға мүмкіндік берді. Ойын үш кезеңнен тұрды: «Таңы да, таңырқа» кезеңінде қатысушылар жалпы білімге негізделген жылдам сұрақтарға жауап берді, «Иә немесе жоқ» кезеңінде командалар жасырылған ұғымды табу үшін логикалық ойлау және тұжырым жасау дағдыларын қолданды, ал «Заң және өмір» кезеңінде күрделі тапсырмалар беріліп, терең талдау мен шығармашылық шешім қабылдау талап етілді.

Сайыс барысында жастар жоғары белсенділік танытып, білімдерімен, тапқырлығымен және командалық үйлесімділігімен ерекшеленді. Әр кезеңде әділқазылар үздік нәтижелерді анықтап отырды. Әділқазылар алқасы құрамында «Бейсенбай Аружан Ермекқызы – "Eskeldi jastary" филиалының маманы» және Хайрат Хуанышұлы – Шестаков орта мектебінің әдеп-құқық жұмысы жөніндегі менторы қызмет атқарды.

Іс-шара аясында қатысушылар мен көрермендерге заң мен тәртіп туралы ақпараттық буклеттер таратылып, құқықтық кеңестер берілді. Бұл бастама «Заң мен тәртіп» идеясын насихаттап, жастар арасында заңға құрмет пен жауапкершілік мәдениетін қалыптастыруға өз үлесін қосты.