Ақсу ауданында әлеуметтік осал отбасыларға қолдау көрсету акциясы ұйымдастырылды

Ақсу ауданында әлеуметтік осал санаттағы отбасыларды қолдауға бағытталған «Бір шаңырақ – бір жүрек» атты қайырымдылық акциясы өтті. Бұл игі бастаманың басты мақсаты – аз қамтылған, көпбалалы және көмекке зәру отбасыларға қолдау көрсету, сондай-ақ қоғамда мейірімділік, жанашырлық пен өзара жәрдемдесу құндылықтарын кеңінен насихаттау болды.

Акция аясында ұйымдастырушылар мұқтаж отбасыларға азық-түлік себеттері мен күнделікті тұрмысқа қажетті заттарды табыстап, олардың өмір сүру жағдайын жақсартуға өз үлестерін қосты. Бұл шара көптеген жандарға үміт сыйлап, қоғамдағы әлеуметтік қолдаудың маңыздылығын тағы бір мәрте айқындады.

Аталған іс-шараға Ақсу ауданының прокуратурасы мен «Jetisý jastary» коммуналдық мемлекеттік мекемесінің «Aqsý jastary» филиалы белсенді қатысып, қайырымдылық ісіне атсалысты. Олар бірлік пен жанашырлықтың үлгісін көрсетіп, мұқтаж жандарға қолдау білдіру арқылы қоғамдағы ынтымақты нығайтуға ықпал етті.

Қатысушылардың айтуынша, мұндай бастамалар адамдар арасындағы сенімді арттырып қана қоймай, қайырымдылық мәдениетінің қалыптасуына жол ашады. «Бір шаңырақ – бір жүрек» акциясы – қоғамдағы ізгілік пен қамқорлықтың жарқын көрінісі ретінде көпке үлгі боларлық маңызды әлеуметтік жобаға айналды.