Жетісу облысының «Үлгілі елді мекен» облыстық конкурсын өткізу туралы ереже

1. Жалпы ережелер

 

1. Осы Ереже Жетісу облысының елді мекендері арасында өткізілетін «Үлгілі елді мекен» конкурсының ұйымдастырылуы тәртібі мен жеңімпаздарын айқындау жөніндегі комиссияның (бұдан әрі-Комиссия) қызметін айқындайды.
2. Конкурстың мақсаты:
   • халықтың өмірі мен денсаулығы үшін қолайлы қоршаған ортаны қамтамасыз ету;
   • тұрмыстық қатты қалдықтардың түзілуін және орналастырылуын барынша азайту;

3) елді мекендерде абаттандыруды, жарықтандыруды, көгалдандыруды және санитарлық тазалауды дамыту.

3. Конкурс келесі номинациялар бойынша өткізіледі:
   • «Үлгілі аудан орталығы»;
   • «Үлгілі ауыл»;
   • «Үлгілі аула».

4. Әр номинацияда I, II және III орындардың жеңімпаздары анықталады.

 

2. Конкурс өткізу тәртібі

 

1. Конкурс жыл сайын өткізіледі. Кезеңдер мен мерзімдер келесідей анықталады:

- конкурстық өтінімдер мен материалдарды қабылдау: 15-19 қыркүйек аралығы;

- өтінімдерді іріктеу және комиссия отырысы, шығулар арқылы бағалау (қажет болған жағдайда): 22-30 қыркүйек аралығы;

- жеңімпаздарды жариялау, марапаттау: 2 қазан.

2. Қатысуға өтінім Талдықорған қаласы Балапанов көшесі, 28,
   № 1028 кабинет мекенжайы бойынша «Жетісу облысының қоғамдық даму басқармасы» мемлекеттік мекемесіне бағалау критерийлеріне сәйкестігін растайтын фото-, бейне- және презентациялық материалдарды қоса ұсына отырып беріледі.
3. «Үлгілі аудан орталығы» және «Үлгілі ауыл» номинациялары бойынша бағалау критерийлері:

- өтінімде аудан орталығының/ауылдың кем дегенде 20 фотосы (15х20 см көлемінде шығарылған және электрондық нұсқада), 2 минуттан кем емес түсірілген бейнеролигі және елді мекен туралы ақпарат қысқаша презентация  түрінде (слайдтар) болуы тиіс, олар келесіні қамтуы қажет:

- аудан/ауыл атауы, құрылған жылы, халық саны, әкімінің толық аты-жөні;

- әлеуметтік объектілер туралы ақпарат;

- аумақтың санитарлық жағдайы (көшелердің, аулалардың тазалығы, қоқыс жәшіктері мен контейнерлердің болуы): 0-20 балл;

- көгалдандыру және жасыл желектерге үнемі күтім жасау (гүлзарлар, ағаштар, көгалдандыру, автоматты суару жүйесі): 0-20 балл;

- жаңа саябақтарды, скверлерді, аллеяларды кезең-кезеңімен құру,
сондай-ақ экожобаларды іске асыру: 0-15 балл;

- тұрмыстық қатты қалдықтар полигондарының жай-күйі (нормативтік талаптарды сақтау, тарифтер мен нормаларды бекіту): 0-15 балл;

- көшелер мен қоғамдық аумақтарды жарықтандыру: 0-10 балл;

- әлеуметтік-экологиялық бастамалар (экологиялық білім беру, мектептердің қатысуы, үкіметтік емес ұйымдар және т.б.): 0-10 балл;

- іске асырылатын шешімдердің бейімділігі мен ауқымдылығы: 0-10 балл;

- аталған  номинациялар бойынша тиісті ауданның әкімдіктері және ауылдық округ әкімдіктері қатыса алады.

«Үлгілі аула» номинациясы бойынша бағалау критерийлері:

- өтінімде ауланың кем дегенде 10 фотосы (15х20 см көлемінде шығарылған және электрондық нұсқада), 1 минуттан кем емес бейнеролигі және аула туралы қысқаша мәтіндік ақпарат болуы тиіс (пәтер иелері кооперативінің, мүлік иелері бірлестігінің, жай серіктестіктің, басқарушы компанияның, төрағалардың аты-жөні, ауланың санитарлық жағдайы, абаттандырылуы туралы ақпарат);

- ауланың санитарлық жағдайы (тазалығы, қоқыс жәшіктері мен контейнерлердің болуы): 0-20 балл;

- көгалдандыру және жасыл желектерге үнемі күтім жасау (гүлзарлар, ағаштар, көгалдандыру, автоматты суару жүйесі): 0-20 балл;

- ауланың жарықтандырылуы: 0-10 балл;

- аталған номинацияға көп пәтерлі үйлерінің мүлік иелері бірлестігі, пәтер иелері кооперативтері, жай серіктестік және басқарушы компаниялар төрағалары қатыса алады.

«Үлгілі аула» номинациясы бойынша көп пәтерлі үйлердің басқару компанияларының басшылары, төрағалары бір өтінімнен артық бере алмайды.

4. Балдар тең болған кезде қоғамдық бастамалардың кең спектрін және азаматтардың қатысуын ұсынған қатысушыға артықшылық беріледі.
5. Бағалау ұсынылған материалдар, шығулар арқылы тексерулер (қажет болған жағдайда) және комиссияның сараптамалық бағалауы негізінде жүзеге асырылады.

 

3. Комиссияның міндеті мен құқықтары

 

1. Комиссияның міндеті:

«Үлгілі елді мекен» номинациясы бойынша конкурстың жеңімпаздардын анықтау.

2. Комиссияның:

1) конкурс өткізуге қатысты мәселелер бойынша мемлекеттік органдармен және өзге де ұйымдармен, сондай-ақ қоғамдық бірлестіктермен өзара іс-қимыл жасауға;

2) конкурсты ұйымдастырушылардан комиссияның міндеттерін іске асыру үшін қажетті қосымша материалдарды сұратуға және алуға;

3) комиссияға жүктелген міндеттерді жүзеге асыру үшін қажетті өзге де құқықтар;

4) сарапшылар мен мамандарды тартуға;

5) конкурс шарттарын жақсарту жөнінде ұсыныстар енгізуге құқығы бар.

 

4. Комиссия қызметін ұйымдастыру

 

1. Комиссия мемлекеттік органдардың, үкіметтік емес ұйымдардың өкілдері, қоғам қайраткерлері қатарынан құрылады.
2. Комиссия құрамына кіретіндер:

1) Комиссия төрағасы;

2) Комиссия төрағасының орынбасары;

3) Комиссия мүшелері.

3. Комиссия төрағасы Экологиялық мәдениетті дамытудың 2024 – 2029 жылдарға арналған «Таза Қазақстан» тұжырымдамасын іске асыру жөніндегі мәселелерге жетекшілік ететін облыс әкімінің орынбасары болып табылады.
4. Хатшы Комиссия жұмысын техникалық және ұйымдастырушылық сүйемелдеуді қамтамасыз етеді.
5. Конкурстың жұмыс органы «Жетісу облысының қоғамдық даму басқармасы» мемлекеттік мекемесі болып табылады.
6. Комиссияның жұмыс органына мынадай функциялар жүктеледі:

1) конкурс өткізуді ұйымдастырады;

2) конкурс туралы ақпаратты БАҚ-та және интернет-ресурстарда жариялайды;

3) Комиссия отырыстарына материалдар дайындайды;

4) жеңімпаздарды марапаттау рәсімін ұйымдастырады.

7. Комиссия отырысы оның мүшелерінің жалпы санының кемінде үштен екісі қатысқан кезде заңды деп есептеледі.
8. Конкурс жеңімпаздары атағын беру туралы шешім комиссия отырысының хаттамасымен ресімделеді және оған қатысып отырған барлық комиссия мүшелері қол қояды.
9. Конкурсты қаржыландыру «Жетісу облысының қоғамдық даму басқармасы» мемлекеттік мекемесіне бекітілген бюджет шеңберінде жүзеге асырылады.
10. Конкурстық материалдарда қамтылған және бағалау барысында алынған ақпарат құпия болып табылады және тиісті қатысушылардың жазбаша келісімінсіз жария етуге жатпайды.
11. Комиссия «Дербес деректер және оларды қорғау туралы» Қазақстан Республикасының Заңын сақтауға міндетті.