Қазақстан Республикасының Конституциясы – заңдылық пен қоғамдық тәртіптің негізі: Жетісуда ел Конституциясының 30 жылдығына орай ғылыми конференция өтті
Жетісу облысында ел Конституциясының 30 жылдығына орай «Қазақстан Республикасының Конституциясы – заңдылық пен қоғамдық тәртіптің негізі» атты ғылыми-практикалық конференция өтті. Жиынды облыстық қоғамдық даму басқармасы І. Жансүгіров атындағы Жетісу университетімен бірлесіп ұйымдастырды. Оған мемлекеттік органдардың, ғылым және білім саласының, қоғамдық ұйымдардың өкілдері, қоғам қайраткерлері, жастар қатысты, - деп хабарлайды Жетісу облысы әкімінің баспасөз қызметі.
Талдықорғандағы Салатанат сарайында өткен басқосуға Жансүгіров атындағы Жетісу университетінің ректоры, заң ғылымдарының докторы, профессор Ермек Бурибаев модераторлық етті.
Конференцияның алғашқы баяндамасын Қазақстан Республикасы Сот әкімшілігінің Жетісу облысы бойынша департаменті басшысының орынбасары Әбілсейіт Түлкиев жасап, Ата Заңның тұрақты сот жүйесін қалыптастырудағы рөліне жан-жақты тоқталды. Ал Жетісу университетінің оқытушысы, полиция полковнигі Болат Молдабековтің баяндамасы құқықтық тәртіп пен қоғамдық қауіпсіздікті нығайту мәселелеріне арналды. Сол сияқты еліміздегі мемлекеттіліктің қалыптасуы жөнінде тарих ғылымдарының кандидаты Салтанат Тінистанова айтып берді.
Конституцияның заңнамалық реттеу құралы ретіндегі рөліне Қазақстан Республикасы Парламенті Мәжілісінің депутаттық корпусының ардагері Оралбек Жақиянов арнайы тоқталды. Сондай-ақ конференция барысында депутаттық корпустың ардагері, «Ардагерлер ұйымы» РҚБ облыстық филиалының төрағасы Ермек Келемсейіт сөз сөйледі.
Конференцияда облыс әкімінің атынан, көпшілікті Конституция күнімен құттықтаған облыс әкімінің орынбасары Диас Есдәулетов Жетісу облысының соңғы үш жылда қол жеткен жетістіктерін тілге тиек етті. Сондай-ақ Конституцияның еліміздің бүгінгі және болашақтағы жетістіктерінің берік іргетасы екенін ерекше атап өтті.
- Ата Заңымыз – ел тәуелсіздігінің тірегі, тұрақтылық пен өркендеудің берік іргетасы. Мемлекет басшысы: «Ата Заңды құрметтеу – әрбір азаматтың қасиетті парызы. Біз Конституцияға сүйене отырып, Әділетті Қазақстанды бірге құрып жатырмыз», - деген болатын. Сондықтан Конституцияны қастерлеу арқылы заң үстемдігін орнықтыруға, болашаққа деген сенімді нығайтуға үлес қосамыз. Бүгін айтылған пікірлер мен идеялар жергілікті өзін-өзі басқару жүйесіне оң әсерін тигізіп, қоғамда «Заң және тәртіп» қағидасына сай құқықтық мәдениеттің артуына ықпал етеді деп ойлаймын, - деді қорытынды сөзінде Д.Есдәулетов.
Жалпы, конференция аясында қоғам мен мемлекеттің конституциялық дамуына қатысты өзекті мәселелер талқыланып, сарапшылар мен ғылым саласының өкілдері өз пікірлерін ортаға салды. Спикерлер елдің жарқын болашағын қалыптастыруда әр азаматтың белсенді қатысуының маңыздылығын атап өтіп, жас ұрпаққа патриоттық және құқықтық тәрбие беру жөнінде ой бөлісті.
Жетісу облысы әкімінің баспасөз қызметі.
Фотосуреттерді түсірген: Дмитрий Ерофеев