Алакөлде «Широкая Масленица» мерекесі тойланды

Қыстың соңғы күндері, көктем күн шуағын шашқанда, жарқын жылулықпен, ерекше шаттықпен, жайлылықпен есте қалар мереке – Масленица тойланады.

Осы орайда, бүгін Д.Қонаев атындағы орталық алаңда «Масленица» мерекесіне орай «Раздольная масленица» атты мерекелік іс-шара өтті. Славян халықтарының дәстүрлі мейрамы алакөлдіктерді біріктіріп, қыспен қоштасып, көктемді қарсы алуға үндеді.

Аудан әкімінің орынбасары М.Төлеужанов тұрғындарды масленица мерекесімен құттықтап, бұл мейрамның бірлік пен татулықты нығайтатын ерекше күн екенін атап өтті. Сондай-ақ, мерекені ұйымдастыруға ат салысқан мекемелер мен жеке кәсіпкерлерді алғыс хаттармен марапаттап, түрлі сыйлықтар табыстады.

Орталық алаңда мерекеге орай «Славян» этно-мәдени орталығы мен бөлім, мекеме, білім беру ұйымдарының ұлттық тағамдары ұсынылып, ән мен би көрсетіліп, түрлі спорттық ойындар, конкурстар мен сахналық қойылымдар халық назарына ұсынылды.

Айдынды Алакөлдің тұрғындары мен қонақтары әсем думанның куәсі болып қана қоймай, түрлі ойындар мен байқауларға белсене қатысты.

«Масленицаның» басты атрибуттары – көпшілікке құймақ таратылып, сабаннан жасалған тұлып(чучелка) өртелді. Бұл дәстүр өткеннің қиындықтарын артта қалдырып, жаңа маусымға үмітпен қадам басуды білдіреді. Жиналғандар алау жалынына қарап, көктемнің берекелі болуын тіледі.

Көпшілікті қамтыған мереке аудан тұрғындарына көтеріңкі көңіл-күй сыйлап, достық пен ынтымақтың жарқын көрінісіне айналды.