«Көне тарихи орындарға шолу» атты танымдық сағат ұйымдастырылды

Ынталы ауылдық округінде мектеп оқушыларының тарихи танымын кеңейту және Қазақстанның бай мәдени мұрасын дәріптеу мақсатында «Көне тарихи орындарға шолу» атты танымдық сағат өтті. Іс-шара барысында Ынталы ауылдық округі әкімі аппаратының бас маманы Н. Оқанова оқушыларға еліміздің әр қиырында орналасқан киелі мекендер мен көне сәулет ескерткіштері туралы мазмұнды ақпарат берді. Интерактивті тақта арқылы Қазақстанның символына айналған Қожа Ахмет Яссауи кесенесі бастаған тарихи нысандарға виртуалды шолу жасалды.
Танымдық сағаттың негізгі мақсаты — оқушыларға Қазақстанның ежелгі қалалары мен ортағасырлық сәулет өнерінің бай тарихын таныстырып, жалпыұлттық мұрамызды ұлықтау болды. Кездесу барысында көне жәдігерлерді көздің қарашығындай сақтаудың маңыздылығы түсіндіріліп, мәдени сабақтастықты үзбеу қажеттілігіне баса назар аударылды. Сонымен қатар, бұл шара жас ұрпақтың бойында ел тарихына деген терең мақтаныш сезімін ұялатып, оларды отансүйгіштікке тәрбиелеуді көздеді.
Бас маман Н. Оқанова Қазақстанның тарихи орындары тек өткеннің белгісі емес, бүгінгі Тәуелсіз еліміздің рухани негізі екенін жеткізді. Оқушылар өз кезегінде тарихи деректерге үлкен қызығушылық танытып, еліміздің киелі жерлері туралы өзара пікір алмасты. Мұндай мазмұнды кездесулер мектеп оқушыларының интеллектуалдық деңгейін арттырып, мемлекетіміздің тарихына деген құрметін нығайта түсері анық.