Біз өз еңбегімен, белсенділігімен және елге деген жанашырлығымен туған өлкеміздің дамуына ерекше үлес қосып жүрген жерлестерімізбен таныстыруды жалғастырамыз

Қайырлы күн құрметті Қапал ауылдық округінің тұрғындары! Біз өз еңбегімен, белсенділігімен және елге деген жанашырлығымен туған өлкеміздің дамуына ерекше үлес қосып жүрген жерлестерімізбен таныстыруды жалғастырамыз. Бүгінгі мақаламыздың кейіпкері — Қыдырбек Тасқын, болашағына нық сеніммен қарайтын, өз көзқарасы қалыптасқан, ауыл жастарының белсенді өкілдерінің бірі.

Қыдырбек Тасқын — туған жеріне деген сүйіспеншілікті нақты іспен дәлелдеп жүрген азамат. Ол отбасылы, үш баланың әкесі. Жоғары білімді, “Л.Н. Гумилев атындағы Еуразия ұлттық университетін” үздігі, яғни қызыл дипломмен тәмамдаған. Алдында үлкен қалаларда қалып, мансап құруға мүмкіндік болса да, ол туған ауылына оралып, Қапал ауылының тұрғындарына жан-жақты көмек көрсетуді таңдады.

Бүгінде Қыдырбек Тасқын ауыл шаруашылығы саласында еңбек етіп, өзіне тиесілі ауыл шаруашылығы техникаларын тиімді пайдалануда. Ол ауыл өміріне белсене араласып, тұрғындардың тұрмыстық қалдықтарын шығаруға көмектесіп қана қоймай, өз техникасын пайдалана отырып, ауыл тұрғындары мен мекемелеріне құм, саз балшық және өзге де құрылысқа қажетті материалдарды жеткізу ісінде әрдайым қол ұшын созып келеді. Ауыл шаруашылығы жануарларын ұстайтын азаматтарға қалдықтарды тасымалдау және реттеу мәселелерінде де тұрақты қолдау көрсетіп келеді. Оның еңбегі — үнсіз, бірақ елге аса қажет, күнделікті атқарылатын игі іс.

Соңғы төрт жыл бойы Қыдырбек Тасқынның негізгі бағыты — биогумус өндіру. Ол ауыл шаруашылығы қалдықтарын қайта өңдеу арқылы экологиялық таза, сапалы органикалық тыңайтқыштар дайындайды. Бүгінде оның өнімдеріне сұраныс артып, минералды тыңайтқыштарды сатып алуға ниетті азаматтардан ұсыныстар жиі түсуде. Бұл — істің берекесі мен болашағының айқын дәлелі.

 Қыдырбек Тасқын — кез келген уақытта жүгінуге болатын, ақыл-кеңесін аямайтын, қолдау көрсетуге әрдайым дайын азамат. Осындай адамдар ауылымыздың бүгінін нықтап, ертеңіне берік негіз қалайды.

 Қапал ауылдық округінде осындай еңбекқор, елжанды, туған жеріне адал азаматтардың бары — біз үшін үлкен мақтаныш. Қыдырбек Тасқынның өмір жолы мен еңбегі ауыл жастарына үлгі болып, туған өлкеге деген құрмет пен жауапкершілікті арттыра берсін.