Жас спортшы Қуанған Ернат

 👋 Құрметті Қапал ауылдық округінің тұрғындары!

🏆 Біз сіздерді спортшыларымыздың жетістіктерімен таныстыруды жалғастырамыз. Бүгін сіздерге жас буынның жарқын өкілі — Қуанған Ернат туралы айтқымыз келеді.

💪 Ернат 2007 жылдың 2 қыркүйегінде дүниеге келген. Бала кезінен спортқа, дене жаттығуларына ерекше қызығушылық танытып, әрдайым шыңдалуға ұмтылды. 9-сыныпта оқып жүрген кезінде армрестлингке қызығушылығы оянып, Қапал ауылдық округінде орналасқан Qapal ARMWRESTLING club спорт залына барып жаттыға бастады.

🥇 Уақыт өте келе тынымсыз еңбектің нәтижесі көріне бастады. Ернат округ, аудан, облыс чемпионы атанып, кейін Қазақстан Республикасының вице-чемпионы болды. Жақында ғана ол армрестлингтен оң және сол қол бойынша Қазақстан Республикасының чемпионы атанды. Сонымен қатар, Ернат халықаралық турнирлердің де жеңімпазы, ел намысын абыроймен қорғап жүр.

👨‍🏫 Ернаттың алғашқы бапкері — Чепель Владимир Сергеевич. Ол жас спортшының бойына тәртіптілік, табандылық және жеңіске деген сенімді қалыптастырды. Қазіргі таңда Ернат Ілияс Жансүгіров атындағы Жетісу университетінде білім алып, Талдықорған қаласында жаттықтырушы Досаев Решаттың жетекшілігімен жаттығуда.

🏠 Соған қарамастан, Ернат туған жерін ешқашан ұмытпайды. Әр сенбі сайын ауылға келіп, өзінің алғашқы спорт залына барып, жас спортшылармен бірге жаттығып, тәжірибесімен бөліседі.

🌟 Бүгінгі таңда Ернат — еңбектің, табандылықтың және үлкен арманға деген сенімнің айқын үлгісі. Оның жетістігі — ауыл жастарына үлкен мотивация. Ал болашақта бұдан да биік белестерді бағындыратынына сеніміміз мол.

👏 Біз Ернатпен мақтанамыз! Оған мықты денсаулық, толағай табыс және алдағы жарыстарда жаңа жеңістер тілейміз!