БҮГІН АЙТУЛЫ ОҚИҒА – ҚАЗАҚСТАН ХАЛЫҚ КЕҢЕСІНІҢ АЛҒАШҚЫ СЕССИЯСЫ ӨТТІ.

Жиын барысында Мемлекет басшысы Қасым-Жомарт Тоқаевтың ұсынысымен және дауыс беру қорытындысы бойынша Ерлан Жақанұлы Қошанов Қазақстан Халық Кеңесінің Төрағасы лауазымына сайланды.

Президент Мемлекет пен қоғам арасындағы дәнекер туралы:
«Бұл – конституциялық мәртебесі бар, беделді лауазым. Сондықтан бұл орынға елге белгілі, халық пен биліктің арасында алтын көпір болатын азамат келуге тиіс. Ерлан Жақанұлы – жауапкершілігі жоғары, білікті, мемлекеттік жүйеде мол тәжірибесі бар тұлға. Оның Халық Кеңесі Төрағасы ретінде елдегі қоғамдық келісімді нығайтуға мол үлес қосатынына сенемін», – деді Қасым-Жомарт Тоқаев.

Сонымен қатар Президент консультативтік-кеңесші органның құрамына кәсіби білікті, ел мүддесіне адал, озық ойлы азаматтар енгенін айтып, Кеңес мүшелеріне жүктелген жауапкершіліктің жүгі ауыр екенін айрықша атап өтті.