Мектептер жаңа оқу жылына дайын ба?

Жаңа оқу жылы жақындаған сайын мектептердің дайындығы да басты назарда. Бүгін Жетісу облыстық мәслихатының депутаты Д. Ахмолдаев пен Сарқан аудандық мәслихатының депутаты Ж. Кудияров Сарқан ауданы бойынша 11 мектептің 9-на арнайы барып, оқу орындарының жай-күйімен танысты.

Депутаттар мектептерді аралау барысында оқу жылына дайындықтың қалай жүріп жатқанын көзбен көріп, бірқатар маңызды мәселелерге көңіл бөлді. Оқулықтар жеткілікті ме, мүмкіндігі шектеулі балаларға қолайлы жағдай жасалған ба, мектептердегі қауіпсіздік құралдары жұмыс істеп тұр ма, спорт алаңдары мен дәретханалар қаншалықты таза – осының бәрі назардан тыс қалған жоқ. Сондай-ақ, алдағы қысқы маусымда жылу жүйелерінің ақаусыз жұмыс істеуі үшін қазандықтардың жай-күйі де мұқият тексерілді.

Мониторинг барысында кейбір мектептерде шешімін күтіп тұрған мәселелер де анықталды. Депутаттар бұл жайттарды назарға алып, тиісті мекемелерге нақты ұсыныстар берді.

Бұл жұмыс – балалардың қауіпсіз әрі қолайлы ортада білім алуы үшін жасалып жатқан нақты қадам. Мұндай тексерістер алдағы күндері облыстың басқа аудандарында да жалғасын табады.