Ералы Тоғжанов коронавирусқа қарсы вакцина шығаруды жоспарлап отырған зауыттың құрылысымен танысты

Ералы Тоғжанов коронавирусқа қарсы вакцина шығаруды жоспарлап отырған зауыттың құрылысымен танысты

Дүйсенбі, ҚР Премьер-Министрдің орынбасары Ералы Тоғжанов бастаған үкіметтік делегация Қордай өңірінде барды.

Жұмыс сапары барысында вице-премьер Гвардейский ауылындағы биологиялық қауіпсіздік проблемалары ғылыми-зерттеу институты жанындағы отандық атаулы препараттар шығаратын зауыттың құрылыс барысымен танысты. Зауыт Мемлекет Басшысы Қасым-Жомарт Тоқаевтың тапсырмасына сәйкес салынуда. Құрылыс-монтаждау жұмыстары биыл аяқталады. Қазіргі уақытта барлық инженерлік коммуникациялар жүргізілген. Жұмысқа 145 адам және 30 бірлік техника жұмылылған. Зауыт өз жұмысын келесі жылдың бірінші тоқсанында бастайды деп күтілуде.

Мұнда әлемдік стандарттарға сйкес иммунобиологиялық препараттар, оның ішінде коронавирустық инфекцияға, тұмауға, туберкулезге, бруцеллезге, нодулярлық дерматитке басқа да инфекциялық ауруларға қарсы вакциналар шығарылатын болады. Жыл сайын биопрепараттардың 30-60 миллион дозасын өндіру жоспарланып отыр.

 Премьер-Министрдің орынбасары институт қызметкерлерімен кездесіп, оларды әңгімеге тартты.     
        - Биофармацевтикалық зауыттың құрылысы және коронавирусқа қарсы отандық вакцина жасау Мемлекет басшысының ерекше бақылауында. Біз бүгін барлық көкейкесті мәселелерді осы жерде талқылап, шешу үшін арнайы келіп отырмыз. Тұрғын үймен және материалдық-техникалық қамтамасыз ету, жалақыны көтеру мәселелері қазірдін өзінде шешімін табуда. Сонымен бірге сіздерге үлкен жауапкершілік жүктеліп отыр. Бүкіл ел сіздерге қарап тұр, - деп атап өтті Е.Тоғжанов.

Жамбыл облысының әкімі Бердібек Сапарбаев ірі зауыттың салынуы аймақ экономикасының дамуына жаңа серпін беретіндігін атап өтті.

Бұдан соң Ералы Тоғжанов институт  қызметкерлеріне арналған 60 пәтерлі үйдің құрылыс барысымен танысты. Нысанның құрылысы тамыз айында бастаған десек, ол келер жылдың басында пайдалануға берілмек. Тағы екі тұрғын үйдің құрылысы жоспарлануда.

Институт жұмысымен танысқан Ералы Тоғжанов онда Қордай өңірінің әлеуметтік-экономикалық дамуы, сондай-ақ ғылыми-зерттеу институтының өзекті мәселелерін шешу бойынша кеңес өткізді.

Дереккөз: https://primeminister.kz/