– Мемлекет басшысы Қасым-Жомарт Кемелұлы Тоқаев: «Ұлттың жаңа болмысы білімді, еңбекқор, жауапкершілігі жоғары, ең бастысы – адал азаматтар арқылы қалыптасады» деген болатын. Бүгінгі білім саласының алдында – осындай жан-жақты, ұлттық және адамзаттық құндылықтарды бойына сіңірген тұлғаны тәрбиелеу міндеті тұр. Ол үшін ұстаздар тек пән үйретуші ғана емес, адамгершіліктің шамшырағы, рухани кемелдіктің темірқазығы болуы тиіс. Тәуелсіз еліміздің ертеңі мектеп қабырғасында қалыптасады. Сондықтан әр бала – ұлттың үміті, әр ұстаз – сол үміттің бағбаны, – деді облыс әкімі тамыз конференциясындағы кіріспе сөзінде.

– Қазіргі таңда цифрландыру мен жасанды интеллект – экономиканы да, қоғамды да дамытудағы негізгі факторлардың бірі. Біздің міндетіміз – жаңа буынды тек білімді ғана емес, креативті, заманауи цифрлық технологияларды еркін меңгерген тұлға ретінде тәрбиелеу. Ол үшін білім беру жүйесінің цифрлық трансформациясын жеделдету аса маңызды. Әуелі облыстағы барлық мемлекеттік мектепті жоғары жылдамдықты интернетпен қамтамасыз ету қажет. Әсіресе шалғайдағы ауылдық елді мекендердегі мектептерге айрықша назар аударған жөн, – деді Ербол Қарашөкеев.

– Жалпыға міндетті білім беру – бұл тек баланы мектепке қабылдау ғана емес. Жергілікті атқарушы органдар әрбір балаға сапалы білім алуға, әлеуметтік қолдауға және жан-жақты дамуға қолайлы жағдай жасауға міндетті, – деді аймақ басшысы. – Білім беру ұйымдарындағы ыстық тамақтың сапасына ерекше назар аударуды сұраймын. Осыған байланысты мектеп асханаларындағы күнделікті тамақтың сапасына қатаң қоғамдық бақылау ұйымдастыру қажет.

– «Баланың күлкісі – ең қымбат қазына, ал оның қауіпсіздігі – мемлекет пен қоғамның қасиетті парызы», – деп ел Президенті атап өткендей, өскелең ұрпақтың амандығы мен тыныштығы – баршамыздың ортақ әрі маңызды міндетіміз. Бүгінде мектеп – тек білім мен тәрбие беретін орын ғана емес, сонымен қатар әрбір оқушы өзін қауіпсіз әрі жайлы сезінетін, алаңсыз білім алатын орта болуы тиіс, – деген аймақ басшысы білім беру ұйымдарының бейнебақылау жүйелерін полиция департаментінің Жедел басқару орталығына 1 қыркүйекке дейін толық интеграциялауды міндеттеді.

– Бүгінгі басқосу – жай ғана дәстүрлі жиын емес, бұл – ұлт болашағына ортақ жауапкершілікті бірге арқалап, үлкен мұрат жолында ой тоғыстыратын тағылымды кеңес. Сіздердің еңбектеріңіз ертең ел игілігіне айналады. Сондықтан әр сабақ, әр сөз, әр іс – тәрбиелік мәнге, адамгершілік мазмұнға толы болуы тиіс, – деп сөзін қорытындылаған Ербол Қарашөкеев жаңа оқу жылының ұстаздар мен оқушылар үшін табысты болуын тіледі.

Жамбыл облысында егін жинау науқаны қарқынды жүріп жатыр. Биыл ауыл шаруашылығы дақылдары 640 мың гектар алқапқа егілді. Бұл көрсеткіш өткен жылмен салыстырғанда 14 мың гектарға артып отыр.

Атап айтқанда, 362 мың гектарға дәнді және дәнді-бұршақты, 38 мың гектарға майлы дақылдар, 31,1 мың гектарға көкөніс, 12,7 мың гектарға бақша өнімдері, 8,2 мың гектарға картоп, 6,6 мың гектарға қант қызылшасы, ал 181,3 мың гектарға мал азығы орналастырылды.

Шілде айынан басталған жиын-терінде бүгінге дейін масақты дәнді дақылдардың 311,1 мың гектары жиналып, 462,1 мың тонна өнім алынды. Оның ішінде бидай – 201,5 мың тонна, арпа – 260,6 мың тонна.

Сондай-ақ 58,2 мың тонна картоп, 334,4 мың тонна көкөніс, 3,2 мың тонна майлы дақылдар және 336,1 мың тонна бақша өнімдері жиналды.

2025–2026 жылғы мал қыстату маусымына дайындық аясында 1,7 млн тонна пішен, 113,4 мың тонна пішендеме және 408,7 мың тонна сабан дайындалды.

Биыл аймақта барлығы 3,8 млн тонна ауыл шаруашылығы өнімін алу көзделіп отыр.

Премьер-министр Олжас Бектенов Жамбыл облысына жұмыс сапары аясында Мемлекет басшысының көлік-логистика саласын одан әрі дамыту мақсатында шекаралық өткізу пункттерін жаңғырту жөнінде берген тапсырмасының орындалу барысын тексерді..

Олжас Бектенов Қырғыз Республикасымен мемлекеттік шекарадағы «Қордай» және «Қарасу» автокөлік өткізу бекеттерінде болып, өткізу пункттерінің инфрақұрылымымен, проблемаларымен және одан әрі дамыту жоспарларымен танысты

Көлік министрі Нұрлан Сауранбаев пен ҚР ҰҚК Шекара қызметі директорының орынбасарының уақытша міндетін атқарушы Ұлан Абиков өткізу бекеттеріндегі жағдай туралы баяндады. Одан бөлек, Премьер-министрдің тапсырмасы бойынша жүргізілген жұмыс бабындағы тексерулердің қорытындысы туралы есептер тыңдалды.

ЕАЭО елдерімен шекарада 39 автокөлік өткізу пункті орналасқан. Олардың екеуінде жөндеу жұмыстары толығымен аяқталды. Жаңғырту он пунктте, оның ішінде Қазақстан–Ресей шекарасында басталды. Реконструкциялау жұмыстарымен басқа да өткізу пункттері қамтылады.

«Қордай» АӨБ-те бұған дейін жүргізілген реконструкция нәтижесінде қозғалыс жолақтарының саны 4-тен 8-ге, төлқұжаттық қадағалау кабиналарының саны 20-дан 40-қа дейін артты. Өткізу қабілеті жолаушылар ағыны бойынша 4 есеге, автокөлік бойынша 2,7 есеге өсті.

«Қарасу» пункті бойынша жаңғырту жұмыстары басталды, бұл өткізу қабілетін тәулігіне 700-ден 2 мыңнан астам көлік құралына дейін арттыруға мүмкіндік береді. Сондай-ақ жүк ағыны мен көлік қозғалысын жақсарту үшін де жағдайлар жасалмақ. Жоба шекараның өткізу инфрақұрылымын қазіргі заманғы талаптарға сай ұлғайтуға бағытталған.

Премьер-министр шекара нысандары трансшекаралық ынтымақтастықты дамытуда маңызды рөл атқаратынын және халықаралық автомобиль және жолаушылар қатынасын қамтамасыз ететінін атап өтті. Оларға реконструкция жүргізу Мемлекет басшысының бақылауында тұр.

Олжас Бектенов жөндеу жұмыстарының сапалы әрі уақтылы орындалуын қамтамасыз етуді, сондай-ақ рәсімдеу жұмыстарын жеделдету бойынша цифрлық технологияларды енгізуді жандандыруды тапсырды. Сондай-ақ азаматтар мен сыртқы экономикалық қызметке қатысушылар үшін қауіпсіздікті қамтамасыз ету және жайлылықты арттыру мақсатында жағдай жасау жөнінде бірқатар тапсырма берілді.

Сапар барысында «Батыс Еуропа – Батыс Қытай» халықаралық дәлізінің құрамында тауарларды сақтау, өңдеу, шоғырландыру және өткізудің негізгі орталығына айналатын индустриялық-сауда-логистикалық кешен салу жобасын жүзеге асыру туралы баяндалды.

Олжас Бектенов құрылыс жұмыстарының мерзімі созылып кетуіне байланысты сын айтып, қысқа мерзімде тиісті шаралар қабылдауды және жұмыс сапасы мен қарқынын қадағалауды күшейтуді тапсырды.

Дереккөзі: primeminister.kz

Жамбыл облысында Жұмысшы мамандықтар жылы және Жастар күніне орай 120 орындық жаңа студенттік жатақхана пайдалануға берілді.

Нысанның құрылысын жеке кәсіпкер Меиз Рыспаева жекеменшік әлеуметтік серіктестік аясында жүргізіп, толықтай аяқтады. Жоба жастардың әлеуметтік-тұрмыстық жағдайын жақсарту және қолжетімді білім беру кеңістігін кеңейту мақсатында жүзеге асырылды.

Жатақханада Абай атындағы Жамбыл гуманитарлық жоғары колледждің студенттері тұрады. Ғимарат заманауи стандарттарға сай салынып, барлық қажетті инфрақұрылыммен жабдықталған: жатын бөлмелер, оқу және демалыс залдары, асхана мен кір жуу бөлмелері бар.

Ашылу рәсімі «Jastar Life Talks» мотивациялық форумымен жалғасты. Форумда әртүрлі салада жетістікке жеткен жас мамандар мен танымал тұлғалар студенттермен кездесіп, табысқа жету жолындағы тәжірибелерімен және мотивациялық ойларымен бөлісті. Мақсат – жастарға шабыт беріп, өз армандарын жүзеге асыруға жігерлендіру, өмірлік және кәсіби бағдарларын айқындауға қолдау көрсету.

Іс-шара соңында белсенді жастар марапатталды.

2025 жылғы 14 тамызда Қазақстан Республикасының Мәдениет және ақпарат министрі Тараз қаласына жұмыс сапарымен барады.

Сапар аясында қала тұрғындарымен кездесу және азаматтарды жеке қабылдау жоспарлануда (2025 жылғы 14 тамыз сағат 10:00, Тараз қ., Төле би даңғылы, 87 «Оқушылар сарайы»).

Жеке қабылдауға қатысу үшін өтінімдерді қабылдау сағат 09.00-ден 18.00-ге дейін 8 (7172) 74-13-33, 8 (701) 888-03-22 нөмірлері бойынша жүзеге асырылады.

Аталған мәселе бойынша Жамбыл облысының әкімі Ербол Қарашөкеевтің тапсырмасымен арнайы жұмыс тобы құрылды.

Облыс әкімінің орынбасары жетекшілік ететін жұмыс тобы мәселені толық анықтау, балалардың қауіпсіздігін қамтамасыз ету және құқықтарын қорғау бойынша зерделеу және тексеру жұмыстарын жүргізетін болады.

Зерделеу нәтижесіне сәйкес қосымша ақпарат жолданады. Қазіргі таңда тиісті құзырлы органдармен бірлесіп жасөспірімдердің қауіпсіздігін қамтамасыз ету бойынша нақты шаралар қолға алынды.

Көтерілген мәселеге сәйкес осы секілді келеңсіз жағдайлардың алдын алу мақсатында алдағы уақытта өңірдегі өзге де білім мекемелері жан-жақты зерделенеді.

Абай Құнанбайұлының 180 жылдық мерейтойына орай Жамбыл облысында кемеңгер тұлғаның ескерткішіне гүл шоқтары қойылып, рухына тағзым етілді.

Салтанатты шараға облыс әкімі Ербол Қарашөкеев, облыстық және қалалық мәслихаттар мен қоғамдық кеңестің төрағалары, басқарма басшылары, ардагерлер, зиялы қауым, Қазақстан халқы Ассамблеясының мүшелері, үкіметтік емес ұйымдар мен саяси партиялар, жоғары оқу орындарының ректорлары, әдебиет сүйер қауым қатысты.

Ұлы ойшылдың айтулы мерейтойына байланысты облыс орталығы мен аудандарда әдеби кештер, дөңгелек үстелдер, «Абай оқулары» сияқты танымдық әрі тәрбиелік мәні зор іс-шаралар өтуде.

Айта кетейік, Жамбыл облысында Абай есімімен аталатын 1 ауылдық округ, 2 елді мекен, 1 даңғыл, 113 көше мен тұйық жолдар, сондай-ақ 11 білім беру мекемесі, 1 колледж, 1 бастауыш мектеп-гимназия және 1 кітапхана бар.