Семинар-кездесу өтті
Аудан әкімдігінде мемлекеттік қызметшілерге арналған семинар-кездесу өтті. Жиында «Қазақстан Республикасының мемлекеттік қызметі туралы» жаңа Заңда қарастырылған негізгі өзгерістер мен жаңашылдықтар түсіндірілді. Семинар-кездесуді аудан әкімі аппаратының басшысы Самат Селеубаев ашып, жүргізді. Жиынға аудан әкімдігінің бөлім басшылары мен ауылдық округ әкімдері, сондай-ақ аудандық бөлімдер мен ауылдық округ әкімдері аппараттарындағы іс-қағазға жауапты мемлекеттік қызметшілері қатысты.
Семинардың мақсаты – жаңа заң талаптарын мемлекеттік қызметшілерге қарапайым әрі түсінікті түрде жеткізіп, олардың құқықтары мен міндеттерін нақтылау. Жаңа өзгерістердің негізгі бағыты – мемлекеттік қызметті ашық, әділ әрі халыққа жақын ету.Семинар-кездесуде мемлекеттік қызметке қабылдану тәртібі, конкурс өткізу жүйесі, қызметшілердің әлеуметтік кепілдіктері, еңбегіне қарай қызметтік деңгейі мен жалақысының өсу мүмкіндігі, сондай-ақ көтермелеу және тәртіптік жауапкершілік мәселелері сөз болды. Бұдан бөлек, мемлекеттік қызметшілердің әдеп нормаларын сақтауы, сыбайлас жемқорлықтың алдын алу, жеке мүддені қызметтік міндеттермен араластырмау және азаматтардың өтініштеріне жауапкершілікпен қарау мәселелеріне назар аударылды