Мемлекеттік қызметтер көрсету жәрмеңкесі өткізілді

 Жамбыл ауданында тұрғындарға қолайлы жағдай жасау және мемлекеттік қызметтердің қолжетімділігін арттыру мақсатында ауқымды мемлекеттік қызметтер жәрмеңкесі ұйымдастырылды. Аталған шараға аудан тұрғындары белсенді қатысып, өздерін толғандырған сұрақтарға нақты жауаптар алып, қажетті қызмет түрлерін бір алаңда алу мүмкіндігіне ие болды. Жәрмеңке барысында мемлекеттік органдар мен мекемелердің өкілдері халыққа қызмет көрсету бағытында кең ауқымды ақпараттық-түсіндіру жұмыстарын жүргізді. Атап айтқанда, жер қатынастары, әлеуметтік көмек, тұрғын үй, денсаулық сақтау, білім беру, кәсіпкерлік және өзге де салалар бойынша кеңестер берілді. Сонымен қатар, электрондық үкімет порталы арқылы қызмет алу жолдары түсіндіріліп, цифрлық қызметтердің артықшылықтары насихатталды. Іс-шараның басты мақсаты – азаматтарға мемлекеттік қызметтерді жедел әрі сапалы түрде ұсыну, халықтың құқықтық сауаттылығын арттыру және ашықтықты қамтамасыз ету. Осы ретте тұрғындар қажетті анықтамалар мен құжаттарды рәсімдеп, мамандардан кеңес алып, түрлі мәселелерін сол жерде шешу мүмкіндігіне ие болды.