Қала әкімі тұрғындарды жеке сұрақтарымен қабылдады

Тараз қаласының әкімі Бақытжан Орынбеков кезекті рет тұрғындарды жеке сауалдарымен қабылдады.

Қабылдау барысында азаматтар тұрғын үй, жұмысқа орналастыру, ауыз су жүргізу, «Қарасу» шағынауданындағы №7 үйді жөндеуден өткізу, «Шаңырақ» алабына жарық жүйесін қосу бойынша сауалдарын қойды.

Сонымен қатар тұрғындар тарапынан қураған талдарды кесу, қараусыз қалған нысанды сүру, жаяу жүргіншілер өткелі мен бағдаршам орнату, сондай-ақ өзге де тұрмыстық жеке сипаттағы мәселелер көтерілді.

Бақытжан Әмірбекұлы азаматтардың сұрақтарына қолданыстағы заңнама талаптарына сәйкес жауап берді.

Қабылдау қорытындысында жауапты тұлғаларға көтерілген түйткілдерді жан-жақты зерделеп, кезек күттірмейтін өтініш-тілектер бойынша тиісті шешімдер қабылдау тапсырылды.

Еске сала кетейік, «Халық үніне құлақ асатын мемлекет» тұжырымдамасы аясында азаматтарды жеке мәселелері бойынша қабылдау алдын ала жазылу арқылы тұрақты негізде жүзеге асырылады.