Бүгін ҚР Конституциясының 30 жылдығына орай «Ұлы дала» шағын ауданында жаңа кітапхана пайдалануға берілді

Салтанатты шараға Тараз қаласының әкімі Бақытжан Орынбеков, зиялы қауым өкілдері мен шаһар тұрғындары қатысты.

 Шаһар басшысы өз құттықтау сөзінде ұлт руханиятын дамыту маңызды міндет екенін айрықша атап өтті.

 Сонымен қатар жазушы, драматург, публицист, «Алаш» әдеби сыйлығының лауреаты Елен Әлімжан, «Қазақстанның еңбек сіңірген қайраткері», «Тараз қаласының Құрметті азаматы, ақын Қайырбек Асанов және «Алаш» әдеби сыйлығының иегері, Қазақстанның еңбек сіңірген қайраткері Көсемәлі Сәттібайұлы сөз алып, жылы лебіздерін жеткізді.

 45 мыңнан астам тұрғыны бар «Ұлы Дала» шағын ауданында ашылған кітапхананың жалпы көлемі 400 шаршы метр, кітап қоры 41 000 дананы құрайды. Сондай-ақ, руханият ордасында оқырмандарға абонемент, оқу залы, «Коворкинг» орталығы қызмет көрсетіп, келушілердің бос уақытын тиімді әрі пайдалы өткізуіне барлық жағдай жасалған.

Жалпы, қазіргі таңда шаһар аумағындағы 17 кітапханада кітап қоры 495 мың дананы құрап отыр.