Қалада тазалық жұмыстары жүргізілуде

Облыс әкімі Ербол Қарашөкеев қаланы аралау барысында тазалық жұмыстарына қатысты бірқатар сын-ескертпе айтты.

Бүгінде шаһарда тазалық жұмыстары үздіксіз жүзеге асырылып келеді. Коммуналдық сала мамандары күнделікті шаһар аумағын қоқыстан тазартып, абаттандыру және көгалдандыру бойынша жұмыстарды атқаруда. Сонымен қатар, биыл «Жасыл Ел - Тараз» мекемесіне қосымша 200 қоғамдық жұмысшыға орын берілді.

Қала әкімінің өкімімен «Таза Қазақстан» экологиялық акциясы аясында айлық сенбіліктер ұйымдастырылып, көше жолдары, арық-атыздар, шағын аудан аулалары мен негізгі каналдар тазалануда. Оған мекеме қызметкерлері, кәсіпкерлер және қала тұрғындары үлес қосуда.

Облыс әкімі кеше бүгін жоспардан тыс Бәйтерек және Ақбұлақ шағын аудандарына барып, тазалық жұмыстарымен танысып, кемшіліктер бойынша нақты тапсырмалар берді.

Қазіргі таңда аталған аумақтарда және қаланың өзге де алқаптарында санитарлық жұмыстар жүргізілуде.

Жалпы шаһардағы тазалық жұмыстары қала әкім Бақытжан Орынбековтың жеке бақылауында.