Қазақстан Орталық Азия елдері арасында жан басына шаққандағы су тұтыну көлемі ең төмен мемлекет ретінде танылды.

World Population Review аналитикалық сервисінің мәліметінше, Қазақстанда бір адам тәулігіне орта есеппен шамамен 3 397 литр су тұтынады.

Салыстыру үшін:

Қырғызстан — 4 153 литр,
Тәжікстан — 4 460 литр,
Өзбекстан — 4 778 литр су тәулігіне бір адамға шаққанда.

Ал өңірдегі ең жоғары көрсеткіш Түрікменстан елінде тіркелген — бір адам тәулігіне 15 445 литрге дейін су пайдаланады. Бұл көрсеткіш бойынша Түрікменстан әлемде бірінші орында тұр.

Мамандар Орталық Азиядағы жоғары су тұтынуды бірнеше фактормен байланыстырады. Соның негізгісі — суармалы егіншіліктің кең дамуы. Әсіресе мақта, күріш сияқты суды көп қажет ететін дақылдарды өсіру үшін орасан көлемде су жұмсалады. Өңірде судың басым бөлігі ирригациялық жүйелерге кетеді.

Сонымен қатар, ыстық әрі құрғақ климат та суға деген сұранысты арттырады. Жаз мезгілінде халықтың да, ауыл шаруашылығы саласының да су қажеттілігі көбейеді. Кей елдерде ескірген инфрақұрылым мен тозған каналдар салдарынан су тасымалдау кезінде көп мөлшерде ысырап болады.

Сарапшылардың айтуынша, бұл статистика тек тұрмыстық тұтынуды ғана емес, сонымен бірге өнеркәсіп, энергетика және ауыл шаруашылығында пайдаланылатын суды да қамтиды. Сондықтан жан басына шаққандағы көрсеткіштер адамдардың үй жағдайындағы күнделікті су пайдалануынан әлдеқайда жоғары болуы мүмкін.

Еуропа елдерінде су тұтыну көлемі Орталық Азиямен салыстырғанда айтарлықтай төмен. Мысалы:

Германия — тәулігіне 856 литр,
Франция — 1 236 литр,
Австрия — 1 144 литр,
Финляндия — шамамен 3 414 литр су тұтынады.

Ал Қазақстанда бұл көрсеткіш — 3 397 литр.