Түрлене бер, Таразым!

Екі мың жылдан астам тарихы бар көне Тараз қаласы бүгінде қарқынды дамып, заманауи, жайлы әрі көрікті аймақ орталығына айналуда. Соңғы жылдары қаланың аумағы едәуір кеңейді, ауқымды инфрақұрылымдық жобалар іске асырылуда: сумен жабдықтау жүйесі жолға қойылып, көшелер жарықтандырылып, жолдар жөнделіп, аулалар абаттандырылуда, қоғамдық көлік жүйесі жаңартылуда. Мұның бәрі қаланың өндірістік әлеуетінің артып, экономикасының нығайып келе жатқанын көрсетеді.

Биыл Таразда 48 көпқабатты тұрғын үйдің құрылысы жүргізілуде. «Ұлы Дала» шағынауданында 144 үй салынды, «Балауса» шағынауданында 145 үйдің 22-сі салынып жатыр, «Шапағатта» 12 үй пайдалануға берілді, тағы 4 үйдің іргетасы құйылуда. «Қарасайда» 158 үйдің құрылысы жоспарланған, жобалық-сметалық құжаттама дайындалуда.

Жол жөндеу жұмыстары қарқынды жүргізілуде — 2025 жылы 108 көше жаңартылады, 20 бау-бақша серіктестігінде 104 көше тегістеліп, қиыршық тас төселді. Қала бойынша 35 шақырымнан астам жаяу жүргіншілер жолы салынуда. Рысбек батыр, Қойгелді және Асқаров сияқты ірі көшелер жөнделді. «Бурыл-А», «Бурыл-Б» және «Бурыл-В» тұрғын алаптарында 75 көшенің 66-сы асфальтталды, «Барысханда» — 24 көшенің 10-ы жөнделді. Абай даңғылында жерүсті өткелі салынуда, алдағы уақытта Абай – Сыпатай батыр – Жамбыл даңғылы қиылысында эстакада пайда болады. Сонымен қатар, Талас өзені арқылы өтетін көпірді жаңарту жоспарда бар.

Білім беру саласында да ілгерілеушілік бар. «Ұлы Дала» шағынауданында 2000 оқушыға арналған жаңа мектеп ашылды, «Шөлдалада» 600 орындық мектептің құрылысы жүріп жатыр. Бірқатар гимназияларда кеңейту және күрделі жөндеу жұмыстары жүргізілуде. Бұған қоса, «Құмшағалда» 140 орындық Мәдениет үйі ашылды.

Қала көшелерді жарықтандыру мәселесін белсенді шешіп жатыр: 2023 жылы 83 көше, 2024 жылы 76 көше жарықтандырылса, 2025 жылы тағы 85 көше жарықтандырылады. Үш жылда 1100-ден астам аула жарықтандырылмақ. Электр желілері саяжай алаптарына тартылып, жылу жүйесі жаңартылып жатыр.

Жасыл аймақтарды абаттандыру, каналдар мен суару жүйелерін қалпына келтіру де басты назарда. Тараз қаласының әкімі Бақытжан Орынбековтің айтуынша, соңғы онжылдықтарда арық жүйесі тозып кеткен — инженерлік желілер жөнделмеген, ал кейбір кәсіпкерлер тіпті каналдардың үстіне құрылыс салған. Қазір бұл жүйе кезең-кезеңімен қалпына келтірілуде: 2023–2025 жылдары 57 шақырымнан астам арық жөнделеді. Бірқатар шағынаудандарда, соның ішінде «Ұлы Далада» «Түйте» каналы бойында заманауи демалыс аймағы салынды. Жақын жылдары «Үшбұлақ» және «Қарасу-2» каналдары ретке келтіріліп, олардың жанында саябақтар, спорт және воркаут алаңдары, қарттарға арналған демалыс орындары ашылады. Сондай-ақ, «Гидрокешен» ауданындағы саябақты абаттандыру жоспарда бар.

Осының бәрі туризмнің дамуына да оң әсерін тигізуде. Тараз барған сайын туристер үшін тартымды қалаға айналып келеді: мұнда 123 қонақүй мен басқа да орналастыру орындары, 28 туристік компания, 8 тарихи-мәдени нысан жұмыс істейді, соның ішінде — «Тектұрмас», «Қарахан», «Айша бибі», «Дәуітбек», «Қали Жүніс» және «Көне Тараз». 2025 жылдың бірінші тоқсанында Таразды 26 мыңнан астам ішкі турист және 373 шетелдік келуші аралады. Қызмет көрсету сапасы жақсаруда: орналастыру орындарының саны 2024 жылғы 2700-ден, 2025 жылы 3500-ге дейін артты. Цифрландыру аясында барлық қонақүйлер WhatsApp мессенджерінде бірыңғай чатқа біріктірілді — бұл жедел ақпарат алмасуға мүмкіндік береді.

Өткен жылмен салыстырғанда туризм саласына инвестиция көлемі аздап төмендегенімен, 2025 жылдың қаңтар–шілде айларында 5,4 млрд теңге инвестиция тартылған. Бірқатар жаңа жобалар жүзеге асырылуда: «Жанды сабақтар» — оқушыларға арналған тарихи экскурсиялар; «Қолөнершілер үйі» — шеберлерді қолдау және оқыту орталығы; «Үздік қолөнерші» байқауы — үздік шеберлерді ынталандыру үшін; «Ежелгі бекініс» жобасының бірінші кезеңі іске қосылып, онда мәдени іс-шаралар мен жәрмеңкелер өтуде, «South Holiday» қонақүй кешені салынып жатыр, «Эфен» ЖШС жүзеге асырып жатқан демалыс аймағы (3,5 млрд теңге).

Сауда саласы да назардан тыс қалған жоқ. Кейбір ескі базарлар жабылғанымен, жаңа, заманауи сауда орталықтары ашылды. Мемлекеттік бағдарлама аясында 2026 жылға дейін «Ауыл-Береке», «Береке», «Якка сарай», «Жібек жолы» және «Салтанат» атты бес ірі базарды толық жаңғырту жоспарланған.

Осылайша, Тараз — көне тарихы бар ғана емес, болашағы зор, заманауи және серпінді дамып келе жатқан қала. Қала әрі қарай да гүлдене беріп, тұрғындары мен қонақтарын көркімен және мүмкіндіктерімен қуанта берсін!