ҰЛТТЫҚ АУЫЛ ШАРУАШЫЛЫҒЫ САНАҒЫ: АУДАН КӨЛЕМІНДЕ 13 340 АУЛА МЕН 3 358 АУЫЛ ШАРУАШЫЛЫҒЫ ТАУАРЫН ӨНДІРУШІНІ ҚАМТУ ЖОСПАРЛАНУДА

Бүгін аудан әкімі Ернар Есіркеповтің төрағалығымен ұлттық ауыл шаруашылығы санағына дайындық барысына арналған кеңес өтті. Жиынға аудандық мәслихат депутаттары, ауылдық округ әкімдері, бөлім басшылары, қоғамдық кеңес пен қауымдастық мүшелері қатысты.

Кеңес барысында 2025 жылғы 1 тамыз бен 20 қазан аралығында өтетін санақтың маңыздылығы кеңінен сөз болды. Одан бөлек, науқан туралы аудан тұрғындары арасында ақпараттандыру жұмыстарын жандандыру, жұмысты тиімді үйлестіру мәселелері жан-жақты талқыланды.

Аталған науқан аясында аудан көлемінде 13 340 аула мен 3 358 ауыл шаруашылығы тауарын өндірушіні қамту жоспарлануда. Осы мақсатта 7 нұсқаушы мен 29 интервьюер жұмысқа тартылатын болады. Сонымен қатар, аудан тұрғындары санаққа қатысты ақпарат пен кеңесті тәулік бойы қызмет көрсететін 1446 call-орталығы арқылы ала алады.

Кеңес қорытындысында аудан әкімі Ернар Есіркепов ұлттық ауыл шаруашылығы санағының сапалы ұйымдастырылуы – жауапты құрылымдардың өзара үйлесімді әрекетіне тікелей байланысты екенін атап өтіп, кеңеске қатысушыларды аталған санаққа белсенді атсалысуға шақырды.