ШЫҒАНАҚ АУЫЛДЫҚ ОКРУГІНДЕГІ КЕЗДЕСУ: ХАЛЫҚ ҮНІ – НЕГІЗГІ БАҒДАР

Мойынқұм ауданының әкімі Ермек Карентаев Шығанақ ауылдық округінің тұрғындарымен жоспарлы кездесу өткізіп, елді мекендегі өзекті мәселелерді тұрғындармен бірге талқылады. Мемлекет басшысының тапсырмасына сәйкес ұйымдастырылған бұл жиын ашық диалог форматында өтіп, халық пен билік арасындағы тікелей байланысты нығайтуға бағытталды.

Кездесу барысында ауыл тұрғындары күнделікті тұрмысқа әсер ететін бірқатар маңызды мәселелерді көтерді. Атап айтқанда, елді мекендегі банкоматтың жиі істен шығуы тұрғындарға қолайсыздық туғызып отырғаны айтылды. Сонымен қатар, ауыз су жүйесін жаңарту жұмыстарының сапасы мен орындалу барысы да тұрғындар назарында екені байқалды.

Бұдан бөлек, тұрмыстық қатты қалдықтарға арналған арнайы полигон салу қажеттігі, ауылдағы медицина қызметкерлерінің тапшылығы және жаңа жедел-жәрдем көлігімен қамтамасыз ету мәселелері де кеңінен қозғалды. Бұл сұрақтардың барлығы ауыл тұрғындарының өмір сапасына тікелей әсер ететін маңызды тақырыптар екені атап өтілді.

Аудан әкімі Ермек Карентаев әрбір көтерілген мәселені мұқият тыңдап, тиісті сала басшыларымен бірге нақты жауаптар берді. Жекелеген мәселелер бойынша шешу жолдары сол жерде ұсынылса, кешенді түрде қарауды қажет ететін түйткілдер бақылауға алынып, жауапты бөлімдерге нақты тапсырмалар жүктелді.

Мұндай кездесулердің басты маңызы – халықтың шынайы мәселелерін дер кезінде анықтап, оларды шешудің нақты жолдарын қарастыру. Себебі ауылдағы нақты жағдай мен тұрғындардың күнделікті тұрмысы – атқарушы билік жұмысының басты көрсеткіші.

Кездесу қорытындысы бойынша көтерілген барлық мәселелер назарға алынып, олардың орындалуы кезең-кезеңімен бақылауда болады. Алдағы уақытта да осындай ашық форматтағы кездесулер жалғасып, халық пен билік арасындағы тиімді кері байланыс нығая бермек.