Мойынқұм ауданында әлеуметтік нысандардың жай-күйі бақылауда

Мойынқұм ауданының әкімі Ермек Карентаев жұмыс сапарымен Қызылтал ауылдық округіне барып, бірқатар маңызды әлеуметтік нысандардың жағдайымен танысты. Іссапардың негізгі мақсаты – жүзеге асырылып жатқан құрылыс және жөндеу жұмыстарының сапасы мен мерзімін бақылау, сондай-ақ нысандардың қазіргі жай-күйін зерделеу болды.

Сапар барысында аудан әкімі Көкжелек ауылындағы Бауыржан Момышұлы атындағы орта мектеп ғимаратында жүргізілген шатырды жөндеу жұмыстарының нәтижесімен танысты. Білім беру нысанындағы атқарылған жұмыстардың сапасы қаралып, мектептің жалпы техникалық жағдайына назар аударылды. Сонымен қатар, оқу процесіне қолайлы жағдай жасау, ғимараттың қауіпсіздігі мен ұзақ мерзімді пайдаланылуын қамтамасыз ету мәселелері талқыланды.

Аудан басшысы жауапты мердігер ұйымдар мен тиісті сала мамандарына жүргізілген жұмыстардың сапасын тұрақты бақылауда ұстау қажеттігін атап өтті. Әсіресе, әлеуметтік нысандарда атқарылатын әрбір жұмыс тұрғындардың, соның ішінде оқушылардың қауіпсіздігі мен қолайлы жағдайына тікелей әсер ететінін жеткізді.

Іссапар аясында аудан әкімі Күшаман ауылында жаңадан салынып жатқан спорт нысанының құрылыс барысымен де танысты. Құрылыс алаңында жүргізіліп жатқан жұмыстардың қарқыны, материалдардың сапасы және белгіленген мерзімдерге сәйкестігі жан-жақты қаралды. Аталған нысан ауыл жастарының спортпен тұрақты айналысуына мүмкіндік беріп, салауатты өмір салтын қалыптастыруға оң ықпал ететін маңызды жоба ретінде бағаланды.

Нысан басында мердігер мекеме өкілдері атқарылып жатқан жұмыстар туралы баяндап, алдағы жоспарларымен бөлісті. Өз кезегінде аудан әкімі құрылыс жұмыстарын белгіленген мерзімде және сапалы түрде аяқтаудың маңыздылығына тоқталып, жауапты тұлғаларға нақты тапсырмалар жүктеді.

Жұмыс сапарының қорытындысы бойынша Ермек Карентаев барлық нысандардағы жұмыстардың сапасына ерекше мән беру қажеттігін атап өтіп, олардың уақытылы пайдалануға берілуін қамтамасыз етуді тапсырды. Сонымен қатар, әлеуметтік инфрақұрылымды дамыту бағытындағы жұмыстар аудан бойынша алдағы уақытта да жүйелі түрде жалғасын табатынын жеткізді.