Мойынқұмда марапат – еңбектің нақты бағасы

Мойынқұм ауданында өңірдің әлеуметтік-экономикалық дамуына елеулі үлес қосқан азаматтарды марапаттау рәсімі өтті. Аталған іс-шарада ел дамуына, қоғам игілігіне бағытталған адал еңбегімен ерекшеленген бірқатар азаматтардың жетістіктері жоғары бағаланып, лайықты марапаттар табысталды.

2025 жылдың қорытындысы бойынша өңірдің әлеуметтік-экономикалық дамуына қосқан үлесі үшін Естаев Мұратхан Тұрарханұлы Жамбыл облысы әкімінің «Облысқа сіңірген еңбегі үшін» медалімен марапатталды. Бұл марапат – жыл бойы атқарылған жүйелі жұмыстар мен нақты нәтижелердің заңды қорытындысы, сондай-ақ өңірдің өркендеуіне қосқан сүбелі үлестің айқын көрінісі.

Сонымен қатар, Жамбыл облысы әкімінің «Құрмет грамотасымен» Жамбыл ауылдық округінің әкімі Қалыбаева Аксана Жамбылқызы марапатталды. Оның ауылдық округті дамыту, тұрғындардың тұрмыс сапасын арттыру, әлеуметтік мәселелерді шешу бағытындағы еңбегі жоғары бағаланып отыр.

Марапатталғандар қатарында республикалық деңгейдегі маңызды науқанға белсене қатысқан азаматтар да бар. Қазақстан Республикасы Президентінің қаулысына сәйкес, 2026 жылғы 15 наурызда өткен республикалық референдумды ұйымдастыру мен өткізуге белсенді қатысқаны үшін Тулеулиев Мейірхан Берікұлы Мемлекет басшысының «Алғысымен» марапатталды. Бұл – елдік маңызы бар саяси науқандағы жауапты еңбектің лайықты бағасы.

Сондай-ақ, Қазақстан Республикасы Президентінің «Алғыс хатымен» Мойынқұм ауданы әкімі аппаратының ұйымдастыру-инспекторлық бөлімшесінің басшысы Жайлау Мейрхан Әлиханұлы марапатқа ие болды. Оның мемлекеттік қызмет саласындағы кәсіби біліктілігі мен жауапкершілігі, жүктелген міндеттерді сапалы орындауы ерекше атап өтілді.

Жалпы, марапат иелерінің әрқайсысы өз саласында жоғары нәтижелерге қол жеткізіп, ауданның әлеуметтік-экономикалық дамуына нақты үлес қосып келеді. Олардың еңбегі – кәсібиліктің, жауапкершіліктің және туған жерге деген жанашырлықтың айқын үлгісі.

Мойынқұм ауданында адал еңбек әрдайым еленіп, лайықты бағасын табады. Бұл – өзгелерге үлгі, жаңа жетістіктерге бастайтын сенімді қадам.