РАЗЪЯСНЕНЫ ПРОГРАММЫ ПОДДЕРЖКИ СЕЛЬСКОГО ХОЗЯЙСТВА

Мойынқұм ауданында ауыл шаруашылығын дамытуға бағытталған мемлекеттік бағдарламаларды түсіндіру мақсатында аудан тұрғындарымен арнайы жиын өтті. Аталған кездесуге Жамбыл облысы әкімдігі ауыл шаруашылығы басқармасының қызметкерлері, «Тараз» әлеуметтік-кәсіпкерлік корпорациясының өкілі және «ҚазАгро» (Аграрлық) корпорациясының мамандары қатысты.

Жиын барысында ауыл тұрғындарына мемлекет тарапынан ұсынылып отырған қолдау тетіктері жан-жақты таныстырылып, бағдарламаларға қатысу шарттары мен талаптары егжей-тегжейлі түсіндірілді. Атап айтқанда, «Ауыл аманаты», «Береке» және «Игілік» бағдарламалары бойынша қаржыландыру мүмкіндіктері кеңінен баяндалды.

Мамандардың айтуынша, «Ауыл аманаты» жобасы ауыл тұрғындарының кәсіпкерлік бастамаларын қолдауға бағытталған. Бұл бағдарлама аясында жеке кәсіп ашуға, сондай-ақ кооперативтер құру арқылы бизнесті дамытуға 2,5 пайыздық жеңілдетілген несие алуға мүмкіндік бар. Аталған жоба ауылдағы табыс көздерін әртараптандыруға және халықтың әл-ауқатын арттыруға септігін тигізеді.

Ал «Береке» және «Игілік» бағдарламалары мал шаруашылығын дамытуға бағытталған. Бұл бағдарламалар арқылы 6 пайыздық мөлшерлемемен шетелден асыл тұқымды ірі қара мал сатып алуға несие қарастырылған. Нәтижесінде ауыл шаруашылығы өнімдерінің сапасын арттырып, өңірдегі мал шаруашылығының әлеуетін күшейтуге мүмкіндік туындайды.

Кездесу барысында тұрғындар өздерін толғандырған сұрақтарын қойып, сала мамандарынан нақты жауаптар алды. Сонымен қатар, бағдарламаларға қатысу тәртібі, қажетті құжаттар тізімі және қаржыландыру шарттары бойынша кеңестер берілді.

Осындай түсіндіру жұмыстары ауыл тұрғындарының мемлекеттік қолдау шаралары туралы ақпараттануын арттырып, олардың кәсіпкерлік белсенділігін дамытуға оң әсерін тигізеді. Бұл өз кезегінде ауыл экономикасының дамуына және халықтың тұрмыс деңгейінің жақсаруына ықпал ететін маңызды қадам болып табылады.