ҚОРДАЙ АУДАНЫНДА МҮГЕДЕКТІГІ БАР АЗАМАТТАРДЫҢ САЙЛАУ ҚҰҚЫҚТАРЫН ҚАМТАМАСЫЗ ЕТУ МӘСЕЛЕЛЕРІ ЗЕРДЕЛЕНДІ
2026 жылғы 12 тамызда Қордай ауданының аумақтық сайлау комиссиясы жанындағы мүгедектігі бар адамдардың сайлау құқықтарын қамтамасыз ету жөніндегі жұмыс тобы аудан аумағындағы бірқатар сайлау учаскелерінің қолжетімділігін зерделеу мақсатында аралау жұмыстарын жүргізді.
Жұмыс тобының құрамында аумақтық сайлау комиссиясы жанындағы мүгедектігі бар адамдардың сайлау құқықтарын қамтамасыз ету жөніндегі жұмыс тобының жетекшісі Г. Ниязгулова, топ мүшелері: аудан әкімдігінің жұмыспен қамту және әлеуметтік бағдарламалар бөлімінің маманы М.Джартыбаева, «Мол нәсіп» қоғамдық бірлестігінің төрайымы Д.Жайлаубекова, сондай-ақ мүгедектігі бар сайлаушылар болды.
Аралау барысында сайлау учаскелерінің мүгедектігі бар азаматтар үшін физикалық қолжетімділігіне, кедергісіз дауыс беруге қажетті жағдайлардың жасалуына және тиісті құрал-жабдықтардың болуына ерекше назар аударылды.
Зерделеу барысында жұмыс тобы:
- сайлау учаскелеріндегі мүгедектігі бар азаматтар үшін жасалған жағдайларды бағалады;
- учаскелердің кіреберістері мен пандустарының қолжетімділігін тексерді;
- дауыс беруге арналған орындардың талаптарға сәйкестігіне назар аударды;
- азаматтардың сайлау құқықтарын кедергісіз жүзеге асыруына қажетті жағдайлардың қамтамасыз етілуін зерделеді.
«Мол нәсіп» қоғамдық бірлестігінің төрайымы Д.Жайлаубекова мүгедектігі бар азаматтардың сайлау процесіне толыққанды қатысуы үшін сайлау учаскелерінің физикалық қолжетімділігімен қатар, қызметкерлердің азаматтармен дұрыс қарым-қатынас жасауы мен қажетті көмек көрсетуі де маңызды екенін атап өтті.
Ал мүгедектібі бар азаматтың бірі сайлау учаскелерін аралау барысында мүгедектігі бар азаматтарға жасалған жағдайлармен жақынырақ танысқанын айтты.
«Сайлау учаскелерінің қолжетімділігі, пандустар мен қажетті құралдардың болуы зерделенді. Мүгедектігі бар сайлаушылардың дауыс беруіне қажетті жағдайлар жасалғанын атап өткім келеді. Әрбір азаматтың сайлау құқығын кедергісіз жүзеге асыруы маңызды. Алдағы уақытта қолжетімді ортаны одан әрі жетілдіру қажет деп есептеймін», – деді ол.
Жұмыс тобының аралау жұмыстарының негізгі мақсаты – мүгедектігі бар азаматтардың сайлау процесіне тең дәрежеде қатысуына мүмкіндік жасау, олардың конституциялық сайлау құқықтарын жүзеге асыруына кедергі келтіретін факторларды анықтау және сайлау учаскелерінде қолжетімді орта қалыптастыру.
Жалпы, мұндай зерделеу жұмыстары мүгедектігі бар азаматтардың сайлау құқықтарын қамтамасыз ету бағытындағы шараларды жетілдіруге, сайлау учаскелерінің қолжетімділігін арттыруға және әрбір азаматтың сайлау процесіне тең дәрежеде қатысуына жағдай жасауға ықпал етеді.