Жамбылдық дәрігерлер Оңтүстік Кореяның жетекші клиникаларында тәжірибеден өтуде
21 сәуірден бастап Жамбыл облысынан 10 дәрігерден құралған делегация Корея Республикасында кәсіби тәжірибеден өтуде. Іссапар аясында олар бірқатар алдыңғы қатарлы медициналық мекемелерге барды, атап айтқанда, Dongguk университеттік клиникасы, H+ Yangji ауруханасы және елдегі ең ірі медициналық орталықтардың бірі – Asan Medical Center.
Тәжірибе барысында ерекше назар қазіргі заманғы медициналық технологияларға аударылды. Оның ішінде Da Vinci роботтандырылған жүйесін пайдалану арқылы жүргізілетін хирургиялық операцияларға қатысу мүмкіндігі болды. Бұл – қазіргі таңда Қазақстанның да бірқатар емдеу мекемелеріне ендіріліп жатқан озық технологиялардың бірі. Жамбылдық мамандар аз инвазиялық роботтандырылған холецистэктомия (өт қабын алып тастау операциясы) барысын бақылап, кореялық хирургтардың айтуынша, бұл әдіс қан кетуді азайтып, асқынулардың алдын алып, науқастардың тезірек сауығуына сеп болатынын көрді.
Жамбыл аудандық орталық ауруханасының бас дәрігері Сейдахмет Чинибековтің айтуынша, бұл іссапар «өте пайдалы тәжірибе» болып, заманауи хирургиядағы жаңа тәсілдер туралы білімді кеңейтуге мүмкіндік берді. Оңтүстіккореялық әріптестер өз тәжірибелерімен белсенді бөлісіп, алдағы уақытта кәсіби ынтымақтастықты жалғастыруға қызығушылық білдірді.
Айта кетерлігі, қазақстандық дәрігерлердің бұл тәжірибесі жергілікті бұқаралық ақпарат құралдарының да назарын аударды. Оңтүстік Кореяның бірқатар газеттерінде H+ Yangji ауруханасында Da Vinci роботымен жасалған операцияларды бақылаған қазақстандық команда туралы кең көлемді материал жарияланды. Онда мұндай халықаралық медициналық алмасулардың жиілеп бара жатқаны және Оңтүстік Корея клиникаларындағы жоғары технологиялар мен практикалық тәжірибе шетелдік мамандар үшін үлкен қызығушылық тудырып жатқаны айтылған.
Тәжірибе алмасу әлі де жалғасуда. Жаңа әдістер мен технологиялармен танысу барысында біз жаңалықтарды өз парақшамызда бөлісіп отырамыз. Мұндай халықаралық ынтымақтастықтар отандық денсаулық сақтау жүйесінің дамуына ықпал етіп, қазақстандық мамандардың кәсіби өсуіне жаңа көкжиектер ашады.