Инфекциялық қауіпсіздік мәселелеріне арналған тәжірибелік семинар өтті

Жамбыл облыстық перинаталдық орталығының базасында медициналық көмек көрсету кезінде туындайтын инфекциялардың алдын алу және эпидемиологиялық бақылауды күшейту мәселелеріне арналған оқыту-тәжірибелік семинар өтті.

Жиынды ҚР Денсаулық сақтау министрлігі Ана мен бала денсаулығын сақтау департаменті директорының орынбасары Жанар Садуова ашты.

Семинар барысында Жамбыл облысындағы медициналық ұйымдардағы инфекциялық қауіпсіздіктің қазіргі ахуалы туралы Ұлттық қоғамдық денсаулық сақтау орталығы Инфекциялық бақылау және микробқа қарсы төзімділікті үйлестіру бөлімінің басшысы Гауһар Ағажаева баяндама жасады. Ол мониторингтік топ жұмысының қорытындыларына сүйене отырып, өңірдегі инфекциялық бақылау жүйесінің жай-күйіне талдау жасап, медициналық ұйымдарда инфекциялық бақылаудың ұлттық бағдарламасын іске асыру барысы туралы жан-жақты ақпарат ұсынды.

Сонымен қатар қатысушыларға Қазақстандағы ауруханаішілік инфекциялардың таралуы мен микробқа қарсы препараттарды қолдануға қатысты соңғы ұлттық зерттеулердің нәтижелері таныстырылды. Баяндаманың маңызды бөлігі антибиотиктерге төзімді микроорганизмдердің көбеюі жағдайында хирургиялық қауіпсіздікті қамтамасыз етудің мультимодальды тәсілдеріне, сондай-ақ қол гигиенасын қоса алғанда, инфекцияның алдын алуға бағытталған стандартты сақтық шараларына арналды.

Семинар жұмысына облыстық перинаталдық орталықтың және өңірдегі өзге де медициналық ұйымдардың бөлімше меңгерушілері, госпитальдық эпидемиологтар, акушер-гинекологтар, реаниматологтар, мейіргерлер мен бактериологтар қатысты.

Іс-шара барысында инфекциялық бақылаудың заманауи тәсілдерін тәжірибеге енгізу және дәрігерлер мен орта буын медицина қызметкерлерінің кәсіби біліктілігін арттыру мәселелеріне ерекше назар аударылды.

Ұйымдастырушылардың айтуынша, мұндай көшпелі оқыту семинарлары өңірлердегі нақты ахуалды бағалауға ғана емес, медицина қызметкерлерін инфекциялық асқынулардың алдын алудың тиімді әрі заманауи әдістеріне тікелей оқытуға мүмкіндік береді.

Медициналық ұйымдардағы инфекциялық қауіпсіздікті күшейту – әсіресе антибиотиктерге төзімділіктің жаһандық деңгейде артуы – еліміздің денсаулық сақтау жүйесінің басым бағыттарының бірі болып қала береді.