I типтегі нейрофиброматоз: Аймақтағы онкологтар мен неврологтар сирек кездесетін генетикалық ауруды талқылау үшін бас қосты

Бүгін Жамбыл облыстық көпбейінді онкология және хирургия орталығында «Ересектердегі I типтегі нейрофиброматоз» тақырыбында ғылыми-тәжірибелік шара өтті.

Бұл басқосу аймақтағы онкологтар мен неврологтардың басын қосып, сирек кездесетін нейрофиброматоз ауруын анықтау мен емдеудің жаңа жолдарын бірлесе саралауға мүмкіндік берді.

Іс-шара қатысушыларына алғашқы болып Жамбыл облыстық көпбейінді онкология және хирургия орталығы директорының орынбасары Гүлжан Тайтелі сөз арнап, көтерілген тақырыптың өзектілігін атап өтті. Ол сирек кездесетін генетикалық аурулармен ауыратын науқастарды бақылау кезінде мамандар арасындағы тығыз әрі нәтижелі әріптестіктің маңызын ерекше атап өтті. Оның айтуынша, дәл осындай өзара іс-қимылдың арқасында I типтегі нейрофиброматоз сияқты күрделі ауруларды дер кезінде анықтап, тиімді ем жүргізуге мүмкіндік бар. Өз сөзінің қорытындысында Гүлжан Тайтелі баяндамашылар мен қатысушыларға кәсіби талқылауға белсенді араласқандары үшін ризашылығын білдірді.

Ғылыми-тәжірибелік жиын аясында мазмұнды екі баяндама тыңдалды.

Бірінші болып онкоорталықтың химиотерапия бөлімінің меңгерушісі Зүлфия Әлиева сөз алып, «Плексиформды нейрофибромалары бар I типтегі нейрофиброматоз» тақырыбында баяндама жасады. Ол өз сөзінде НФ1 ауруының эпидемиологиясы, диагностикасы мен клиникалық көріністеріне жан-жақты шолу жасады. Зүлфия Әлиеваның айтуынша, I типтегі нейрофиброматоз — мультижүйелі ауру, оның белгілері мен ағымы науқандар арасында әртүрлі болуы мүмкін. Бұл дерттің онкологиялық асқыну қаупі жоғары, әрі онкологиялық өлім-жітім көрсеткіші де алаңдатарлық деңгейде екенін ескерткен дәрігер, науқастарды өмір бойы бақылап отыру қажеттігін баса айтты. Бақылау тактикасын таңдауда қосалқы асқынулар мен олардың жас ерекшеліктеріне сай даму ықтималдығы ескерілуі тиіс. Мозаикалық формадағы НФ1 бар науқастар жеке клиникалық жағдайына байланысты қадағаланады. Сонымен қатар ол мультидисциплинарлық тәсілдің пациенттердің өмір сүру сапасын сақтауда және ем нәтижесін жақсартудағы маңызды рөлін атап өтті.

Іс-шарада «НФ1 кезіндегі плексиформды нейрофибромалары бар науқастарды бақылау» тақырыбында баяндама жасаған Жамбыл облысы денсаулық сақтау басқармасының штаттан тыс бас неврологы, облыстық көпбейінді аурухананың неврология бөлімінің меңгерушісі Айгүл Момуналиева негізгі диагностикалық және емдік тәсілдерге тоқталды. Ол бұл ісік түрінің тек НФ1 кезінде ғана кездесетінін, олар шеткері жүйке қабықтарынан пайда болатын қатерсіз ісіктер екенін түсіндірді. Бұл патология 30–50% НФ1 науқастарында дамиды және көбінесе туа біткен болып келеді. Ерте жаста қарқынды өсуімен ерекшеленетін бұл ісіктер әртүрлі көлемде және орналасуда болуы мүмкін. Олар бірнеше жүйке мен оның тармақтарын қамтып, перифериялық жүйке бойымен таралады.

Баяндамалардан кейін қатысушылар өзара пікір алмасып, тәжірибелерімен бөлісті. Күрделі әрі сирек кездесетін генетикалық ауруды диагностикалау мен емдеудің нақты жолдарына қатысты бірқатар сұрақтар қойылып, практикалық ұсыныстар талқыланды.