Жамбыл облысында халықты міндетті әлеуметтік медициналық сақтандыру жүйесімен қамтуды арттыру шаралары талқыланды

Жамбыл облысы әкімінің орынбасары Айжан Есмағамбетованың төрағалығымен халықты міндетті әлеуметтік медициналық сақтандыру (МӘМС) жүйесімен қамту мәселелері бойынша облыстық штаб отырысы өтті. Іс-шараға Жамбыл облысы бойынша Әлеуметтік медициналық сақтандыру қоры филиалының директоры Ғайни Аймағанбетова, облыстық денсаулық сақтау басқармасының басшысы Сержан Назарбек, Тараз қаласы мен аудан әкімдерінің орынбасарлары, облыстық жұмыспен қамтуды үйлестіру және әлеуметтік бағдарламалар басқармасы, көші-қон қызметі және білім басқармасының өкілдері қатысты.

Күн тәртібінде келесі мәселелер қаралды: облыс халқын МӘМС жүйесімен қамтуды арттыру; «B» санатындағы сақтандырылмаған азаматтардың тізімін нақтылау; халық тарапынан медициналық қызметтердің сапасына байланысты шағымдардың санын азайту.

Отырыс барысында халықты МӘМС жүйесімен қамтудың ағымдағы деңгейі туралы ақпарат тыңдалып, сақтандырылмаған азаматтар бойынша деректерді нақтылау және медициналық қызмет сапасына байланысты шағымдарды азайту мәселелері талқыланды. Қор филиалының директоры Ғ. Аймағанбетова баяндамасында оң динамикаға қарамастан, халықтың сақтандыру жүйесіне тартылу деңгейі төмен аудандар бар екенін атап өтті.

2025 жылғы 23 шілдедегі жағдай бойынша Жамбыл облысында 946 мыңнан астам адам сақтандырылған, алайда шамамен 230 мың адам МӘМС жүйесінен тыс қалып отыр. Сақтандырылмағандар саны ең көп тіркелген аудандар — Қордай, Меркі және Шу аудандары. Әсіресе Қордай ауданына ерекше назар аударылды. 23 шілдедегі мәліметке сәйкес, аудан халқының саны — 143 183 адам, оның ішінде 33 517 адам сақтандырылмаған. Бұл көрсеткіш бойынша МӘМС жүйесімен қамту деңгейі – 77%, ал 23% адам жүйеден тыс қалып отыр. Сақтандырылмағандар арасында ер адамдардың үлесі – 64%, әйелдердікі – 36%. Ең көп сақтандырылмағандар 18 бен 44 жас аралығындағы азаматтар – 22 130 адам. ЖСН (жеке сәйкестендіру нөмірі) бойынша егжей-тегжейлі талдау жүргізіліп, нақты тізімдер жасалып, жергілікті деңгейде жұмыс бағыттары айқындалды.

Сондай-ақ баяндамашы соңғы бір айда облыста сақтандырылмаған азаматтар саны 4 500 адамға артқанын атап өтті. Ол жергілікті атқарушы органдардың жұмысын нақты және жедел жүргізудің маңыздылығын атап өтті. Атап айтқанда, көші-қон деректерін жаңарту, қайтыс болғандарды тіркеу, қоныс аударғандар мен бас бостандығынан айыру орындарынан босатылғандарды есепке алу, сондай-ақ өзін-өзі жұмыспен қамтыған азаматтармен жұмыс жүргізу қажеттігін айтты.

Облыс әкімінің орынбасары Айжан Есмағамбетова аудан әкімдерінің орынбасарларына және медициналық мекеме басшыларына халықты МӘМС жүйесіне тарту бойынша нақты шаралар қабылдауды тапсырды. Атап айтқанда, Қордай ауданына ЖСН бойынша деректерді пайдалана отырып, бекітілген алгоритмге сәйкес жағдайды жан-жақты талдау тапсырылды. Қалған аудандар да өз есептерін дайындауы тиіс.

Отырыстың қорытындысында А. Есмағамбетова жауапты ведомстволарға ақпараттық-түсіндіру жұмыстарын жандандыруды, халықтың шағымдарын азайтуды, медициналық мекемелер басшыларының жауапкершілігін күшейтуді және мақсатсыз шығындарға жол бермеуді тапсырды. МӘМС жүйесі қолжетімді және сапалы денсаулық сақтау қызметін қамтамасыз етудің маңызды құралы болып қала беретіндігі, оған әрбір азаматтың қатысуы өңір халқының денсаулығын нығайтуға ықпал ететіні атап өтілді.