«ДАҢҚ» ЗАЛЫНДА БАУЫРЖАН МОМЫШҰЛЫНЫҢ МУЗЕЙІ АШЫЛДЫ

Ұлы Жеңістің 80 жылдығы мен Кеңес Одағының Батыры, көрнекті жазушы және даңқты қолбасшы Бауыржан Момышұлының туғанына 115 жыл толуына орай, облыстық тарихи-өлкетану музейіне қарасты «Бауыржан Момышұлы» музейінің салтанатты ашылу рәсімі өтті.

Музейдің лентасын облыс әкімі Ербол Қарашөкеев, Әскери қайраткер, генерал-майор Сейітжан Қойбақов, облыстық ардагерлер кеңесінің төрағасы Еркінбек Солтыбаев және Бауыржан Момышұлының немере баласы Бекет Момынқұл қиды.

Аталған музей облыстық тарихи-өлкетану музейінің құрамындағы «Даңқ» залының екінші қабатында орналасқан. Заманауи форматта жасақталған бұл кеңістік Бауыржан Момышұлының өмір жолын жан-жақты таныстырып, келушілерді батырдың ерлігі мен адамгершілік болмысына терең бойлатуға мүмкіндік береді.

Экспозицияда батырдың балалық шағынан бастап, әскери қызметтегі ерлігі, соғыстан кейінгі қоғамдық қызметі мен шығармашылық мұрасы жан-жақты қамтылған. Көрмеге оның жеке заттары, сирек фотосуреттері, қолжазбалары, марапаттары, әскери киімі мен құжаттары қойылған.

Музей — ұрпаққа өнеге, ерлікке тағзым. Бұл рухани орда жастарды патриоттыққа тәрбиелеуге, ұлттық тарих пен тұлғаларымыздың мұрасын дәріптеуге зор үлес қосатыны сөзсіз.