Театр шекарадан биік: Таразда «Женитьба» қойылымының тұсаукесері өтті

Жамбыл облыстық орыс драма театрының сахнасында Н.В. Гогольдің «Женитьба» пьесасы желісімен қойылған спектакльдің көптен күткен премьерасы өтті. Қойылым Беларусь Республикасынан келген театр өнерінің өкілдерімен бірлескен халықаралық шығармашылық жоба аясында жүзеге асырылды.

Қойылымның режиссері — Даниил Филиппович, балетмейстері — Вадим Дубовик. Спектакльдің көркемдік безендіруін Қазақстан Республикасының мәдениет үздігі Рахат Сапаралиева жасады.

Премьера екі күнге созылды: көрермендерге басты рөлдерде өнер көрсеткен әртүрлі актерлік құрам ұсынылды. Екі ұжым да режиссерлік ойды жоғары деңгейде жеткізіп, кәсіби шеберлік пен сахнаға деген адалдықтарын көрсете білді. Нәтижесінде — көрерменнің ыстық ықыласы мен көрермен толы зал.

Мұндай халықаралық жобалар — тек маңызды шығармашылық оқиғалар ғана емес, сонымен қатар тәжірибе алмасуға, кәсіби өрісті кеңейтуге және мәдени диалогты нығайтуға мүмкіндік беретін бағалы алаң. Шетелдік шеберлермен бірлескен жұмыс театр труппасын шабыттандырып, жаңа көркем көкжиектерге жол ашады.

Ынтымақтастықтың белгісі әрі естелік ретінде белорус қонақтарына қазақ халқының рухани мұрасының символы — домбыра тарту етілді. Бұл музыкалық аспап — құрметтің, достықтың және мәдени үндестіктің белгісі.

Осындай жобалар — сенім мен өзара түсіністіктің көпірі. Олар өнер тілі шекарасыз екенін және жүректерді біріктіретін қуатқа ие екенін тағы бір мәрте дәлелдейді.