ТАРАЗ ҚАЛАСЫНДАҒЫ «ҰЛЫ ДАЛА» ЖАҢА МӨЛТЕК АУДАНЫНДА 1200 ОРЫНДЫҚ ЖАҢА МЕКТЕП АШЫЛДЫ

Өңірде білім саласына айрықша назар аударылуда. Бүгінде облыс мектептерінің материалдық-техникалық базасы нығайып, жаңа мектептер соғылып, апатты, үш ауысымды, оқушы орны тапшылығы бар мектептердің мәселесі тиімді шешімін табуда. Білім беру инфрақұрылымын ресурстық қамтамасыз ету - өңірді дамытуда негізгі бағыттардың бірі болып табылады.

Осыған байланысты Тараз қаласында 1200 орындық жаңа мектеп ғимараты бой көтеріп, пайдалануға берілді. Енді Тараз қалалық №64 орта мектебі аталатын бұл білім ғимаратына жаңа салынған «Ұлы дала» мөлтек ауданының балалары келіп оқитын болады. Сондай-ақ, аталған мектеп демографиялық өсімге байланысты туындаған үш ауысымды мектептің мәселесін шешіп отыр.

2022 жылы құрылысы басталған мектеп ғимараты толықтай заманауи үлгіде салынып, қажетті керек-жарақтармен қамтамасыз етілген. Мұнда спорт залдары, асхана, зертхана кабинеттері мен шеберхана, сондай-ақ 56 оқу бөлмелері мен лингафон кабинеттері бар.

Мектеп ғимаратының ашылу салтанатына зиялы қауым өкілдері, мұғалімдер, оқушылар мен ата-аналар қатысты.

Айта кетейік, биыл білім саласына 284,8 млрд. теңге бөлінді. Ағымдағы жылы 20 мектеп пен 8 мектептің жапсарлас құрылысы жүргізіліп, оның ішінде 3 мектеп пайдалануға берілген болатын. Бүгін төртінші мектептің лентасы қиылып, алғаш рет оқушыларға қоңырау соғылды. Жыл соңына дейін 4 мектеп пен 3 мектептің жапсарлас құрылысы пайдалануға беріледі деп жоспарлануда. Сондай-ақ, «Жайлы мектеп» ұлттық жобасы аясында ағымдағы жылы 7 мектептің құрылысы басталса, келесі жылы 5 мектептің құрылысы басталмақ.