С. Абланов мектебінде маңызды кездесу өтті

Еліміздің саяси жүйесіндегі түбегейлі өзгерістер кезеңі басталды. Бүгін С. Абланов атындағы орта мектеп ұжымымен Конституциялық реформаның басымдықтарын түсіндіру мақсатында мазмұнды кездесу ұйымдастырылды. Жиын барысында жаңа Ата Заң жобасының мәні мен халық үшін маңыздылығы егжей-тегжейлі талқыланды.
Кездесуде атап өтілгендей, биылғы реформалардың басты ерекшелігі – қоғам мен билік арасындағы алшақтықты жойып, байланысты нығайту. Жаңа Конституция жобасы азаматтардың мемлекеттік басқару ісіне тікелей қатысу мүмкіндігін еселеп арттырмақ. Енді қарапайым халықтың заң шығару процесіне ұсыныс енгізуге, ел тағдырына ықпал етуге құқықтық жолы ашылады.
Жиын барысында спикерлер Ата Заң мәтінінің 80 пайызына жуық өзгерістер енгізілгенін тілге тиек етті. Бұл – ескі жүйеден толықтай арылып, "Әділетті Қазақстан" құру жолындағы батыл қадам. Сондықтан бұрынғы заңды түзетумен шектелмей, жаңартылған Конституцияны қабылдау – уақыт талабы.
"Жаңа Ата Заң жобасы – бұл тек құжат емес, бұл әрбір қазақстандықтың ертеңгі күнге деген сенімі. Мектеп ұжымы ретінде біз бұл өзгерістерді қолдап, өскелең ұрпаққа оның мәнін жеткізуіміз керек", – деп атап өтті мектеп басшылығы.
С. Абланов мектебіндегі кездесуде ұстаздар қауымының саяси сауаттылығын арттырып, ортақ мақсатқа жұмылдыруға септігін тигізді. Бұл реформа – еліміздің жаңа белеске көтерілуінің бастауы.