Новый Конституционный закон - новый вектор развития страны

 Бүгін облыстық ақпараттық топ мүшелері Қазақстан халқы Ассамблеясының өкілдерімен кездесіп, ҚР жаңа Конституциясының жобасын талқылады. Ел дамуының жаңа кезеңін айқындайтын құжатты таныстыру барысында қоғамдық келісім мен заң үстемдігі мәселелеріне басымдық берілді.
Кездесу барысында спикерлер Конституцияның жай ғана заңдар жиынтығы емес, ел дамуының бағытын айқындайтын негізгі құндылықтар жүйесі екенін атап өтті. Жаңа жобаның басты ерекшелігі — азаматтардың құқықтары мен бостандықтарын қорғауға барынша басымдық берілуі. Құжат әрбір қазақстандыққа өз ойын ашық айтуға және мемлекеттің маңызды шешімдеріне қатысуға мүмкіндік береді.
Ассамблея мүшелері Ата Заң жобасын талқылау кезінде эмоцияға берілмей, сабырлылық пен парасаттылық танытудың маңыздылығына тоқталды. Ортақ мақсат — ел болашағы үшін тиімді заңнамалық база қалыптастыру. Кездесуге қатысушылар жаңашылдықтарды қолдай отырып, бұл өзгерістерді мемлекетіміздің болашағына тікелей ықпал ететін айрықша тарихи кезең ретінде бағалады.
Қазақстан халқы Ассамблеясының өкілдері атап өткендей, жаңа реформаны қолдау — қоғамның келешегіне, тұрақтылыққа және мемлекеттің ұзақ мерзімді даму векторына салынған инвестиция.
Қазіргі уақытта Ата Заң жобасы қоғамда кеңінен талқыланып жатыр. Көпшілік тарапынан қолдау тауып отырған жаңа нормалар елдің саяси жүйесін жаңғыртып, әлеуметтік әділдікті орнатуға бағытталған. Ақпараттық топ мүшелері бұл тарихи кезеңде әрбір қазақстандықты бейжай қалмауға және маңызды қадамды бірге жасауға шақырды.